Беларускія аграрыі перасягнулі мільённы рубеж ва ўборцы збожжавых і зернебабовых культур. Аб гэтым сведчыць аператыўная інфармацыя Міністэрства сельскай гаспадаркі і харчавання, паведамляе БЕЛТА.
Так, па стане на 27 ліпеня, у рэспубліцы намалочана амаль 1 млн 242 тыс. т збожжа, з якіх 415 тыс. т – аграрыямі Гомельскай вобласці, амаль 365 тыс. т – Брэсцкай. У Магілёўскай і Мінскай абласцях намалочана 168 і 167 тыс. т збожжа адпаведна, у Гродзенскай – 109 тыс. т, у Віцебскай, якая апошняя ўключылася ў жніво, – усяго амаль 18 тыс. т.
Збожжавыя і зернебабовыя ўбраны з 396 тыс. га, што складае 17,6 працэнта ад агульнай плошчы. Лідарам на сёння з’яўляецца Гомельская вобласць, дзе ўбрана амаль 52 працэнты плошчы.
У сярэднім з 1 га сёлета аграрыі ўбіраюць 31,4 ц збожжа, што на 7,9 ц менш, чым у мінулым годзе.
Таксама ў рэспубліцы прадаўжаецца ўборка азімага ячменю – на сёння ўбрана амаль 94 працэнты плошчаў (7,3 тыс. га з 7,8 тыс. га). Намалочана пры гэтым 32,2 тыс. т пры сярэдняй ураджайнасці 44,2 ц/га (гэта на 3,5 ц больш, чым у 2014 годзе). У Гродзенскай вобласці ўраджайнасць азімага ячменю ў бягучым годзе вышэйшая за мінулагоднюю на 7 ц.
Убрана таксама больш за 61 працэнт азімага рапсу, лён выцераблены на 40 працэнтах плошчы, прадаўжаецца нарыхтоўка травяных кармоў.
