Перамагла ў “Снежным снайперы”

Вялікая радасць прыйшла ў наш дом.

Навучэнцы і педагогі Раготнаўскага дзіцячага сада-базавай школы сабраліся на нечарговую лінейку, каб павіншаваць навучэнку 7 класа Дзіяну Пачук з перамогай у абласных спаборніцтвах “Снежны снайпер”. Дзяўчынка заняла першае месца і будзе прадстаўляць Гродзенскую вобласць на рэспубліканскіх спаборніцтвах.

– Што садзейнічала такой бездакорнай перамозе? – спытала я ў настаўніка фізічнай культуры Мікалая Міхайлавіча Анацкі. У адказ пачула : “Кожны дзень праца над сабой. І не толькі бег і стральба. Гэта агульная загартоўка ўсяго арганізма і яшчэ выпрацоўка характару і, безумоўна, трэніроўкі і трэніроўкі, а яшчэ натхнёнасць, упартасць”.

Пажаданні надалей поспехаў ад сяброў і настаўнікаў, словы аб тым, што з такіх дзяўчынак і атрымліваюцца такія спартыўныя славутасці, як Дар’я Домрачава і Надзея Скардзіна, словы падтрымкі і добрыя эмоцыі – усё было тут для Дзіяны.

– Што надалей? – спытала я ў дзяўчынкі.

– Трэніроўкі і трэніроўкі. Хачу быць першай і на рэспубліканскіх спаборніцтвах.

А што ж трэнер? І у адказ пачула сціплае:

– Магчымасць ёсць. Будзем працаваць.

Што ж, у добры спартыўны шлях, Дзіяна, дзяўчынка з глыбінкі! Будзем падтрымліваць цябе і з нецярплівасцю і хваляваннем чакаць тваіх перамог!

Надзея КАНЯВЕГА,
намеснік дырэктара па выхаваўчай рабоце Раготнаўскага дзіцячага сада-базавай школы

Подписывайтесь на телеграм-канал «Гродно Медиа Group» по короткой ссылке @GrodnoMediaGroup