“Падабралі ключ” да будучых адкрыццяў

У сярэдняй школе № 3 горада Дзятлава імя І. Ю. Філідовіча ў рамках навуковага таварыства “Пошук” працуе даследчая майстэрня.

Першы этап далучэння навучэнцаў да даследчыцкай дзейнасці пачынаецца ў 1-4 класах праз конкурс “Я пазнаю свет”. Дзеці вучацца задаваць пытанні, праводзіць назіранні, афармляць праекты, што дазваляе выявіць таленавітых і дапытлівых вучняў. На другім этапе адбываецца фарміраванне навыкаў даследавання ў навучэнцаў 5-7 класаў. Яны вучацца працаваць з крыніцамі, праводзіць анкетаванне, аналізаваць даныя, афармляць вынікі. Педагогі курыруюць групавыя і індывідуальныя праекты, паступова ўскладняючы задачы. На трэцім этапе з вучнямі 8-11 класаў даследчая работа паглыбляецца. Старшакласнікі пад кіраўніцтвам настаўнікаў працуюць над індывідуальнымі тэмамі. Чацвёрты этап – школьны і раённы адборы. Лепшыя работы праходзяць унутраную экспертызу на школьнай навукова-практычнай канферэнцыі, і аўтары прадстаўляюць іх на раённым этапе, дзе пераможцы атрымліваюць пуцёўку на абласны конкурс. Найбольш складаны пяты этап – падрыхтоўка да абласнога і рэспубліканскага іспытаў. Гэта стварэнне прэзентацый, адпрацоўка выступленняў, мадэляванне магчымых пытанняў журы. Так “нараджаюцца” дыпломы, якімі ганарыцца школа.

Нашы навучэнцы з’яўляюцца пераможцамі адкрытай Міжнароднай навукова-даследчай канферэнцыі старшакласнікаў і студэнтаў “Адукацыя. Навука. Прафесія” (Самара), абласной краязнаўчай навукова-практычнай канферэнцыі “Край Гарадзенскі”, рэспубліканскай навукова-тэхнічнай канферэнцыі навучэнцаў з міжнародным удзелам “Мой першы крок у навуку”, іншых.  

Мы верым, што падтрымка дзіцячай дапытлівасці – ключ да будучых адкрыццяў. Паказальны прыклад – бліскучая перамога і дыплом першай ступені ў малодшых навучэнцаў на конкурсе “Я пазнаю свет”. Педагог Таццяна Някрэвіч і вучні 3 “А” класа Валерыя Царык і Еўдакія Ваніслаўчык прадставілі работу па флоры роднага краю з такой шчырай захопленасцю, што журы адзначыла не толькі глыбіню іх назіранняў, але і ўменне трымацца перад аўдыторыяй. Валерыя і Еўдакія не проста расказвалі, а паказвалі, тлумачылі, даказвалі.

Асаблівае месца сярод дасягненняў школы мае канферэнцыя “Крыштальная Альфа”. Гэта інтэлектуальная пляцоўка, дзе правяраецца на трываласць характар і ўменне аргументавана адстойваць перад экспертнай супольнасцю сваю кропку гледжання. Бягучы навучальны год стаў паспяховым: заваявана чатыры дыпломы. У 2025 годзе пасля працяглага перыяду без прызавых месцаў на абласным этапе конкурсу ў секцыі “Матэматыка” атрымана два дыпломы трэцяй ступені. Прызёраў рыхтавалі Таццяна Венская, Алена Шымко, Кацярына Латушка.  

Яшчэ адна яркая перамога – дыплом трэцяй ступені ў Ангеліны Залучан (кіраўнік Марыя Шавель) за работу “Стан і перспектывы развіцця экалагічнага турызму ў Дзятлаўскім раёне” (на прыкладзе рэспубліканскага ландшафтнага заказніка “Ліпічанская пушча”).

Педагогі ўстановы прадоўжаць рабіць усё магчымае, каб кожны вучань мог рэалізаваць свае здольнасці.

Святлана УРБАН,
кіраўнік навуковага таварыства “Пошук” сярэдняй школы № 3 горада Дзятлава імя І. Ю. Філідовіча

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае