Па ўпрыгожаныя вербачкі – у “Сувенір”

Упрыгожаныя галінкі вярбы, дэкаратыўныя яйкі-магніты, арома-сашэ з самаробнага мыла і шмат іншай прыгажосці, якая можа стаць прыемным падарункам да Вялікадня, – усё гэта вынікі работы наведвальнікаў аб’яднання па інтарэсах “Сувенір”.

Пад кіраўніцтвам майстра на ўсе рукі Ліліі Коласавай “Сувенір” адкрыўся на базе Цэнтра сацыяльнага абслугоўвання насельніцтва Дзятлаўскага раёна некалькі гадоў таму. Яго з задавальненнем наведваюць людзі сярэбранага ўзросту і адзначаюць, што прыгажосць не толькі можа ўратаваць свет, але і дорыць шмат прыемных хвілін тым, хто яе стварае.

– Гурток нездарма носіць назву “Сувенір”, – зазначае Лілія Коласава. – Проста мы стараемся майстраваць такія вырабы, якія заўжды спатрэбяцца. Нашы сувеніры наведвальнікі нярэдка забіраюць дамоў, аднак частку прадукцыі можам рэалізаваць. Мы прапаноўваем лялек ручной работы, займаемся мылаварэннем, вырабляем аромасвечкі, гіпсавыя мініяцюры, шмат іншага. Безумоўна, стараемся не прапусціць ніводнага свята і ствараем да яго розныя тэматычныя сувеніры і падарункі.

Цяпер, напрыклад, займаемся паштоўкамі, якія перададзім дзецям Вялікай Айчыннай вайны – землякам, якія нарадзіліся ў перыяд з 1939-га па 1945-ы.

У чаканні Вербнай нядзелі, якая сёлета супадае ў праваслаўных і каталікоў, нарэзалі вербачак і ўручную аздабляем іх кветачкамі і галінкамі з фоамерану. Калі хто з дзятлаўчан захоча сабе такі адметных “букет” ручной работы для асвячэння ў храме, можа да нас звяртацца. Ужо амаль разабралі на падарункі блізкім і сябрам яйкі-магніты, аднак засталося нямала іншых прыемных дробязяў, якія можна падарыць у знак увагі дарагім людзям у светлыя дні Вялікадня.

Ірына СТЫРНІК 

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#Дятловщина #нашалепшае #нашелучшее