Непажаданыя сустрэчы

Выпадкі сутыкнення аўтатранспарту з дзікімі жывёламі на дарогах – з’ява, на жаль, нярэдкая.

Для жывёл яны, як правіла, смяротныя, а дарожна-транспартныя здарэнні з буйнымі капытнымі (лось, алень, кабан, казуля) могуць мець сур’ёзныя наступствы, як для транспарту, так для кіроўцаў і пасажыраў.

Жывёлы выходзяць на аўтадарогі па розных прычынах: часцей за ўсё –накіроўваючыся да месцаў кармлення і назад на адпачынак; некаторых прыцягвае раскіданая дарожнымі службамі салявая сумесь; часам дзікія жывёлы выходзяць на асфальт проста пагрэцца і абсохнуць ад расы (заяц, лісіца), бо тэмпература асфальту звычайна вышэй за тэмпературу паветра; нярэдка дзікія жывёлы выбягаюць на аўтадарогі, калі іх праследуюць драпежнікі або паляўнічыя сабакі.

У большасці выпадкаў можна пазбегнуць сутыкнення. Калі ў час руху аўтамабіля або на абочыне аўтадарогі з’явілася дзікая жывёла, неабходна максімальна знізіць хуткасць і спыніцца. Звычайна дзікая жывёла ўспрымае аўтамабіль, які рухаецца, як драпежніка, які спрабуе адрэзаць шляхі адступлення, таму яна ў апошні момант кідаецца праз дарогу, каб “выскачыць з акружэння”. Аднак адэкватна ацаніць хуткасць аўтамабіля жывёла не можа, і як вынік — сутыкненне.

Наяўнасць дарожнага знака, які папярэджвае аб магчымасці з’яўлення дзікай або хатняй жывёлы, ужо падстава знізіць хуткасць і павысіць пільнасць, асабліва калі дрэнная агляднасць (напрыклад, дарога акружаная кустамі або дрэвамі) і бачнасць (туман, ападкі, цёмны час сутак).

Жывёла, якая апынулася ў начны час у святле фар, аслеплена. Цемру за межамі святла яна ўспрымае як сцяну і пачынае кідацца, не бачачы нічога, акрамя асветленага ўчастка дарогі і святла фар. У такой сітуацыі варта спыніцца, выключыць фары, але пакінуць уключанымі габарытныя агні, уключыць аварыйную светлавую сігналізацыю, тым самым даць жывёле магчымасць адаптавацца да цемры і сысці з дарогі.

Захаванне правілаў дарожнага руху, у тым ліку хуткаснага рэжыму, і асаблівая асцярожнасць у зоне дзеяння папераджальнага знака “Дзікія жывёлы”, істотна знізіць рызыку аварый, звязаных з неспадзяваным з’яўленнем жывёл на аўтамабільных дарогах.

Тэлефоны для даведак – 8 (01597) 4-53-83, 8 (01597) 4-53-82, 8 -033-3812103.

Максім ЛАГУТА,
намеснік начальніка Навагрудскай міжраённай інспекцыі аховы жывёльнага і расліннага свету