Навіны бібліятэкі. Казкі з куфэрка і “Магія чытання”

З 2024 года Дзятлаўская раённая бібліятэка прымае ўдзел у праекце бібліятэчнага тэатра кніжных прадстаўленняў “Магія чытання”. Гэта казачная ініцыятыва арганізавана аддзелам маркетынгу, сацыякультурнай дзейнасці, метадычнай работы і фарміравання бібліятэчнага фонду. Тэатр з’яўляецца цалкам мабільным: бібліятэкары самі наведваюць дзіцячыя сады і іншыя ўстановы. Галоўным цудам для малечы становіцца чароўны куфэрак “КнігаЧэя”, з якога ў госці да дзяцей прыходзяць і ажываюць любімыя героі кніг, дорачы дашкольнікам незабыўныя эмоцыі і адкрываючы для іх захапляльны свет чытання.

Чэрвень выдаўся асабліва насычаным на казачныя сустрэчы. Супрацоўнікі бібліятэкі завіталі ў госці да выхаванцаў дзіцячых садоў № 1 і № 2 горада Дзятлава, а таксама наведалі раённы цэнтр карэкцыйна-развіваючага навучання і рэабілітацыі. Маленькіх гледачоў чакаў займальны лялечны спектакль “Грыб-церамок”, пастаўлены па матывах вядомай казкі У. Суцеева “Пад грыбам”. Кожная такая сустрэча ператваралася для дзяцей у сапраўднае творчае свята і праходзіла з вялікім поспехам.          

Дзякуючы папулярнаму фармату “сторытэлінг-тэатр”, маленькія гледачы сталі неад’емнай часткай самой гісторыі. Малеча дружна ратавала і абараняла Мураша, Матылька, Мышку, Вераб’я і палахлівага Зайку ад хітрай Лісы. Казка наглядна паказала дзецям правілы мудрага грыбка: “у цеснаце, ды не ў крыўдзе”, навучаючы іх узаемавыручцы, дабрыні і сапраўднаму сяброўству.

Наперадзе новыя пастаноўкі. Ужо ў ліпені чароўны куфэрак “КнігаЧэя” прадставіць лялечны спектакль па асновах АБЖ “Беражы сябе сам”, а ў жніўні парадуе дзяцей пастаноўкай “Пятрушка і Каця”, якая ў гульнявой форме пазнаёміць з правіламі дарожнага руху. Любімыя кніжныя героі зноў выправяцца ў падарожжа, каб падарыць дзецям новыя сустрэчы і карысныя веды.

Алена ЯКАЎЧЫК,
бібліятэкар Дзятлаўскай раённай бібліятэкі

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае