Усебеларускі народны сход сёлета адзначае сваё 30-годдзе.
Настаўніца гімназіі № 1 горада Дзятлава Наталля Клімец, якая была дэлегатам VІ склікання УНС, расказала аб значэнні ўсенароднага форуму для нашай краіны:
– Усебеларускі народны сход займае асаблівае месца ў палітычнай сістэме суверэннай Беларусі. Гэта вышэйшы прадстаўнічы орган народаўладдзя, які аб’ядноўвае дэлегатаў ад усіх рэгіёнаў, галінаў улады і грамадскіх арганізацый. Для краіны УНС – не проста пляцоўка для дыялога, а дзеючы механізм, які вызначае стратэгічны кірунак развіцця дзяржавы, забяспечвае пераемнасць курса і абарону нацыянальных інтарэсаў.
Асаблівую значнасць маюць рашэнні ўсенароднага форуму для сістэмы адукацыі. Стратэгічныя дакументы, зацверджаныя на вышэйшым узроўні, задаюць прыярытэты дзяржаўнай палітыкі ў сферы навучання і выхавання. Гэта тычыцца фінансавання школ, каледжаў і ВНУ, умацавання статусу педагога, абнаўлення вучэбных праграм і захавання гістарычнай праўды. Калі на рэспубліканскім узроўні замацоўваюцца дакладныя арыенціры, мясцовыя органы ўлады атрымліваюць адназначны сігнал: укладанні ў адукацыю – гэта ўкладанні ў незалежнасць і будучыню краіны.
Не менш важны ўплыў УНС на фарміраванне грамадзянскасці і патрыятызму ў падрастаючага пакалення. Выхаванне адказнага грамадзяніна немагчыма без агульнай асновы каштоўнасцяў. Рашэнні сходу падтрымліваюць сістэму патрыятычнага выхавання – ад школьных музеяў і ваенна-патрыятычных клубаў да моладзевых парламентаў і студэнцкіх ініцыятыў. Зацверджаныя УНС дакументы разглядаюць гістарычную памяць і патрыятычнае выхаванне як важныя фактары ўмацавання дзяржаўнасці.
Прынцыпова важна і тое, што ў саставе Усебеларускага народнага сходу прадстаўлены моладзь, педагогі, дзеячы навукі і культуры. Гэта дазваляе ўлічваць запыты новых пакаленняў і злучаць іх з вопытам старэйшых. Такі дыялог фарміруе ў маладых людзей пачуццё далучанасці да лёсу краіны, вучыць паважаць закон, берагчы гісторыю і працаваць дзеля дабрабыту роднай зямлі.
Такім чынам, Усебеларускі народны сход умацоўвае суверэнітэт Беларусі праз стратэгічнае кіраванне, а яго рашэнні ў сферы адукацыі і выхавання закладваюць фундамент грамадзянскай самасвядомасці. Менавіта школа, універсітэт і сям’я, абапіраючыся на агульнанацыянальныя рашэнні, фарміруюць пакаленне, якое будзе ганарыцца сваёй краінай, абараняць яе незалежнасць і ўпэўнена будаваць будучыню.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#нашелучшее #нашалепшае
