Чым далей мы ідзём у бок прагрэсу, тым менш цэняцца базавыя чалавечыя каштоўнасці. Такія, як праўдзівае слова, за якое гатовы адказваць. У сацыяльных сетках сустракаюцца такія прэцэдэнты, што не ведаеш, смяяцца тут ці плакаць, ці каля скроні пальцам круціць…
У месенджары TikTok убачыла відэа напаўразваленага будынка з выбітымі вокнамі і подпісам “былая Казлоўшчынская школа”. Вельмі здзівілася, бо сама ў 2002 годзе скончыла гэту самую “былую” Казлоўшчынскую сярэднюю школу, усё там было ў парадку.
Перагледзела відэа яшчэ раз, і стала зразумела, што гаворка ідзе пра Пастаўскі раён Віцебскай вобласці, а не наш. А вось каментатары, не разабраўшыся, пайшлі адразу “шашкай махаць”. Напрыклад, нейкая Алена піша: “Так, у нас на Дзятлаўшчыне многа такіх школ”, і пад гэтымі словамі разгортваецца цэлая палеміка, дзе агучваецца, што гэта, відаць, зусім не тая Казлоўшчына.
А мне так і хочацца спытаць у шаноўнага каментатара, дзе на Дзятлаўшчыне яна бачыла “шмат” недагледжаных школ. Асабліва крыўдна за родную альма матар, таму не адкладваючы адпраўляюся туды, каб паказаць, якія насамрэч у нас школы.
На сёння Казлоўшчынская сярэдняя школа – адна з самых камфортных у раёне па ўмовах, створаных для вядзення адукацыйнага працэсу, а іх кабінет біялогіі – адзін з лепшых у вобласці. Усё навідавоку, але гэта не перашкаджае некаторым крытыкам кіравацца не ўласнымі вачыма, а плёткамі, далёкімі ад рэальнасці.
Дырэктар установы Ігар Данільчык, пытанні пра школу ён таксама сёння атрымліваў па тэлефоне і быў вельмі здзіўлены. Па яго словах, установа адукацыі – нагода для гонару вучняў, настаўнікаў і ўсіх пасялкоўцаў.
– Наша школа набыла новае жыццё ў 2018 годзе, – расказаў Ігар Уладзіміравіч. – У будынках, перададзеных на баланс навучальнай установы Казлоўшчынскім сельскагаспадарчым ліцэем, быў праведзены капітальны рамонт. Тут новае абсталяванне: акрамя зручных кабінетаў, абсталяваных мультыбордамі, інтэрактыўнымі дошкамі і сучаснай камп’ютарнай тэхнікай, ёсць дзве спартыўныя залы з душавымі кабінамі, актавая зала, санвузлы з новай сантэхнікай. Акрамя таго, у 2012 годзе быў рэканструяваны для патрэбаў пачатковай школы асобны будынак, дзе ўмовы навучання таксама выдатныя. У 2024 годзе пры падтрымцы раённага бюджэту ў школьным двары была ўкладзена тратуарная плітка і бардзюры, што зрабіла знаходжанне на яе тэрыторыі яшчэ больш камфортным. Для дзяцей створаны ўсе ўмовы, і гэта дае добры вынік: нашы навучэнцы паспяхова праяўляюць сябе ў абласных рэспубліканскіх і міжнародных навуковых праектах, паказваюць добрыя вынікі ў вучобе.
Гэты аповед будзе няпоўны, калі не паказаць тую самую “былую” Казлоўшчынскую школу, якая выклікала палеміку. Заўважым, што гэты будынак не пуставаў і не быў занядбаны ніколі. Цяпер ён знаходзіцца на балансе сектара культуры райвыканкама, тут размяшчаюцца пасялковы Дом культуры, аддзяленне Дзятлаўскай дзіцячай школы мастацтваў і бібліятэка. Штогод праводзіцца касметычны рамонт, у мінулым годзе быў адрамантаваны дах.
Рэальнасць не супадае са смелымі заявамі каментатараў ад слова зусім. Шкада толькі, што кінуць ілжывыя выказванні ў інтэрнэце – справа хуткая і лёгкая. Да той пары, пакуль за іх не надыдзе адказнасць. Больш складана не абражаць сваю малую радзіму дарма, а працаваць, даглядаць, добраўпарадкаваць – рабіць усё магчымае, каб яна квітнела і прыгажэла.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#школа #фейк #Дятловщина
