У асенне-зімовы сезон Дзятлаўскі раён традыцыйна становіцца месцам прыцягнення для аматараў палявання не толькі з Беларусі, але і з-за мяжы.
Турыстычны інфармацыйны цэнтр рады паведаміць аб пачатку месяца паляўнічага турызму, якім аб’яўлены лістапад, і запрашае гасцей ацаніць багацце нашых лясоў і камфорт паляўнічага комплекса ў аграгарадку Вензавец. Паляўнічыя ўгоддзі Дзятлаўскага лясгаса займаюць салідную плошчу – больш за 45 тысяч гектараў, пераважная частка якіх пакрыта лясамі, што з’яўляюцца домам для ўнушальнай папуляцыі капытных: высакародных аленяў, ласёў, еўрапейскіх ланяў, казуляў. Для аматараў футравага промыслу і птушынага палявання таксама знойдзецца занятак па душы: на Дзятлаўшчыне водзяцца бабры, лісы, зайцы, а на пралётах – вадаплаўная і баравая дзічына. Гасцям, якія цэняць не толькі запал, але і камфорт, Дзятлаўскі лясгас прапануе ўтульны адпачынак у доміку паляўнічага. Ён знаходзіцца ўсяго за адзінаццаць кіламетраў ад райцэнтра, у аграгарадку Вензавец, што робіць яго даступным для гасцей. Комплекс разлічаны на гасцяванне невялікай групы і забяспечаны ўсім неабходным: ад абстаўленай кухні і душавых да спадарожнікавага тэлебачання і месца для барбекю. Пасля насычанага дня на паляванні адпачывальнікі могуць падмацаваць сілы ў лазні, аматары цішыні – прагуляцца па экалагічнай сцежцы і паназіраць за жыхарамі лесу ў іх прыродным асяроддзі.
Паляўнічы турызм на Дзятлаўшчыне пастаўлены на сур’ёзную аснову: лясгас прапануе поўны спектр паслуг: ад арганізацыі індывідуальных і калектыўных тураў (загоннае паляванне, паляванне з падыходу або засады) да афармлення ўсіх неабходных дакументаў. Вопытныя егеры дапамогуць гасцям падрыхтаваць месца палявання і забяспечаць суправаджэнне, а для замежных турыстаў прадугледжана дапамога ў афармленні дазволаў на часовы ўвоз і вываз паляўнічай зброі, а таксама ветэрынарных сертыфікатаў на трафеі.
Наш інфармацыйны цэнтр працуе, каб зрабіць ваша падарожжа на Дзятлаўшчыну максімальна зручным. Мы прадастаўляем даведачную інфармацыю аб рабоце паляўнічага комплексу, дапамагаем з планаваннем маршруту і расказваем аб іншых славутасцях раёна, якія варта наведаць у вольны час. Чакаем вас па адрасе: г. Дзятлава, вул. Леніна, 18, каб. 101.
Адкрыйце для сябе Дзятлаўшчыну – край з багатымі паляўнічымі традыцыямі і гасціннай атмасферай.
Аляксей КІВУЛЯ,
дырэктар Дзятлаўскага раённага турыстычнага інфармацыйнага цэнтра
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#нашелучшее #нашалепшае
