Міністр адукацыі Міхаіл Жураўкоў: Сістэма адукацыі Беларусі да пачатку навучальнага года гатова

Сістэма адукацыі Беларусі да пачатку навучальнага года гатова. Аб гэтым Прэзідэнту Беларусі Аляксандру Лукашэнку далажыў сёння міністр адукацыі Міхаіл Жураўкоў, перадае карэспандэнт БЕЛТА.

«Мы да школы гатовы ў поўнай меры. Усе работы, якія былі намечаны да пачатку летняга перыяду, да 1 верасня будуць выкананы ў поўным аб’ёме, — сказаў міністр. — Выкананы капітальны і бягучы рамонт школ, іх аснашчэнне, у тым ліку спецыяльным абсталяваннем для кабінетаў фізікі, хіміі. Закуплены новыя аўтобусы для арганізацыі падвозу школьнікаў з малых населеных пунктаў у школы ў буйных райцэнтрах».

«Магу з поўнай упэўненасцю сказаць, што сістэма адукацыі да пачатку навучальнага года гатова», — падкрэсліў Міхаіл Жураўкоў.

Ён адзначыў, што ў гэтым годзе ў краіне будзе закрыта 45 малакамплектных школ, дзе колькасць вучняў меншая за 25. Гэтыя вучні размеркаваны па бліжэйшых школах, будзе арганізаваны іх падвоз. У той жа час у краіне адкрыты 43 новыя навучальныя ўстановы.