Мая Дзятлаўшчына. Вавёркі Коржык і Карамелька радуюцца ўтульнаму доміку

Напярэдадні Дня сям’і ў Дзятлаўскім раённым цэнтры карэкцыйна-развіваючага навучання і рэабілітацыі ў новым вальеры-альтанцы наваселле сустрэла сям’я вавёрак – Коржык і Карамелька, якія ў хуткім часе будуць радаваць выхаванцаў установы і гасцей, а пакуль знаходзяцца на каранціне і праходзяць адаптацыю.

Звяркі, як толькі іх выпусцілі з клеткі, спачатку з асцярогай, а потым усё больш актыўна пачалі азнаямленне з новай прасторай для жыцця. Калі Карамелька адразу залезла на верхні ярус і прысела назіраць за падзеямі з даха доміка-гнязда, то Коржык доўга пазіраваў перад камерамі: бегаў па падлозе, залазіў на пянькі, узбіраўся на рашоткі, потым, стомлены,  таксама прымасціўся пад дахам альтанкі.

Калі ж паглядзець на гарэзлівых гадаванцаў цэнтра прыйшлі старшыня райвыканкама Андрэй Садоўскі і член Савета Рэспублікі Нацыянальнага сходу Рэспублікі Беларусь, дэпутат Гродзенскага абласнога Савета дэпутатаў Андрэй Жамойда, які сёння праводзіў у Дзятлаве прыём грамадзян, яны расшчодрыліся на сапраўднае шоу для гасцей: насіліся па вальеры, скакалі, нават упершыню палезлі круціць кола. 

Як расказала дырэктар цэнтра Марына Гуговіч, ідэю вальера з вавёркамі ім падаў кіраўнік раёна. Паколькі на месцы альтанкі раней была зялёная зона і ў рамках праекта “Экападворак” планаваўся экапарк, а старая елка на Новы год “паехала” адсюль у Казлоўшчыну, то, каб захаваць баланс, было прынята пасяліць тут звяркоў.

Фінансаванне праекта ажыццяўлялася за кошт спонсарскай дапамогі КСУПаў “Войневічы” і “Хвінявічы”, самую значную частку работ па ўстаноўцы альтанкі выканаў Дзятлаўскі лясгас. Аддзелачныя работы ажыццяўляліся сіламі калектыву цэнтра, а домікі для вавёрак змайстравалі Казлоўшчынская сярэдняя школа і гімназія № 1 горада Дзятлава.

Самі гадаванцы “прыехалі” ў райцэнтр з Мінскага раёна. Харчуюцца звяркі фундуком, летась нарыхтаваным у лесе работнікамі ўстановы, грэцкімі арэхамі з прыватных падворкаў, спецыяльным кормам з вітамінамі і мінераламі, зелянінай, морквай, агароднінай са сваіх участкаў без хімічных дабавак. Марына Эдвардаўна і надалей заклікала дзятлаўчан не спрабаваць падкормліваць вавёрак, паколькі папкорн, хлеб і іншыя папулярныя прадукты ім строга забаронены.

Палюбавацца Коржыкам і Карамелькай зблізу пасля каранціну можна будзе на ўрачыстым адкрыцці вальера 1 чэрвеня ў Дзень абароны дзяцей.

Для выхаванцаў ЦКРНіР вавёркі – не проста гадаванцы, але і маленькія лекары. Кантакт з жывёламі спрыяльна ўздзейнічае на асаблівых дзяцей. Нездарма для гэтага працэсу ёсць спецыяльны тэрмін “пэт-тэрапія”. Цэнтр наведваюць дзеці, якія цяжка адрываюцца ад бацькоў, і пакуль вавёркі да наваселля жылі ва ўстанове ў невялікай клетцы, раніцай выхаванцы хутчэй супакойваліся, назіраючы за імі. Аднак, па словах Марыны Гуговіч, гэта не толькі тэрапія для дзяцей, але і прыемныя хвіліны для дарослых. Цяпер дзятлаўчанам не давядзецца далёка ездзіць, бо ў родным горадзе з’явіліся гарэзлівыя Коржык і Карамелька, здольныя палепшыць настрой любому чалавеку.  

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga