Дэпутацкія клопаты. Андрэй Жамойда правёў прыём грамадзян і прамую лінію

14 мая член Савета Рэспублікі Нацыянальнага сходу Рэспублікі Беларусь, дэпутат Гродзенскага абласнога Савета дэпутатаў Андрэй Жамойда ў памяшканні райвыканкама правёў асабісты прыём грамадзян і прамую тэлефонную лінію.

Да сенатара паступілі тры тэлефонныя звароты ад жыхароў горада Гродна, якія тычыліся навядзення парадку на зямлі, экалагічных пытанняў і аспектаў прымянення артыкулаў Крымінальнага кодэксу Рэспублікі Беларусь. Каб даведацца, ці паступалі падобныя звароты грамадзян на Дзятлаўшчыне, Андрэй Жамойда запрасіў да дыялогу начальніка раённай інспекцыі прыродных рэсурсаў і аховы навакольнага асяроддзя Дзмітрыя Балькоўскага.

Дзмітрый Георгіевіч расказаў, што паведамленняў аб пажаўцелых дрэвах уздоўж аўтамабільных дарог ад дзятлаўчан не паступала, аднак такія факты фіксаваліся ў час работы камісіі ў саставе прадстаўнікоў інспекцыі прыродных рэсурсаў, РУП “БелДарЦэнтр” і ДРБУ-119. Верагоднай прычынай пашкоджання ляснога фонду ў прыдарожнай паласе называлася дзеянне рэагентаў, якімі апрацоўваюць дарожнае палатно ў зімовы час.

Па астатніх зваротах былі дадзены тлумачэнні ў час прыёму або прапанавана прадаставіць дакументы для больш дакладнага высвятлення сітуацыі.

Падводзячы вынікі прыёму, Андрэй Жамойда падкрэсліў, што зваротаў грамадзян паступае няшмат, а гэта характарызуе актыўную работу кіраўніцтва раёна з насельніцтвам.

– Ёсць шэраг пытанняў, якія выразна адрэгуляваны нашым заканадаўствам, але людзі звяртаюцца ў надзеі штосьці змяніць. Пры гэтым усё адно кожны зварот дэталёва разглядаецца, адрасуецца ў кампетэнтныя органы. Пераважная большасць бытавых зваротаў атрымлівае водгук на раённым узроўні, бо ў раёнах ёсць усе рэсурсы, каб вырашаць пытанні менавіта на месцах, – адзначыў ён. – Трэба больш уважліва ставіцца да людзей, ведаць, чым яны жывуць і з якімі праблемамі неабходна дапамагчы на тым ці іншым узроўні ўлады, каб зрабіць жыццё людзей лепшым – пасыл, які неаднаразова агучваў Прэзідэнт Аляксандр Лукашэнка ў адносінах да дэпутацкага корпуса. З другога боку, такія прыёмы важныя для нас, заканатворцаў. Кіраўнік дзяржавы падкрэсліваў, што законы павінны ісці ад жыцця, адлюстроўваць рэальную карціну і працаваць на перспектыву – толькі тады яны  прынясуць карысць нашай краіне.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga