Самае важнае для кожнага з бацькоў – жыццё іх дзяцей. Складаныя сітуацыі і падзеі, якія балюча перажываюць непаўналетнія, вымушаюць іх рэзка пераацэньваць сваё стаўленне да жыцця, нярэдка выклікаюць пачуццё бессэнсоўнасці далейшага існавання.
Для папярэджання крызісных станаў, захавання і ўмацавання псіхічнага здароўя дзяцей ва ўстановах адукацыі Дзятлаўшчыны з 10 сакавіка па 10 красавіка праходзіць прафілактычны месячнік.
Больш падрабязна на праблеме спынілася дырэктар сацыяльна-педагагічнага цэнтра горада Дзятлава Кацярына Ляўкевіч:
– Крызіс – гэта асаблівы стан псіхічна здаровага чалавека, калі ўплыў жыццёвых абставінаў на яго ўзрастае, а задавальняючага рашэння актуальных і значных супярэчнасцяў не знаходзіцца. Дзіця ж у перыяды крызісу перажывае бездапаможнасць, безнадзейнасць, адчай, засяроджваецца на псіхатраўмуючай сітуацыі, песімістычна ацэньвае сябе і будучыя перспектывы. Непаўналетнія ў крызісным стане маюць вялікую рызыку суіцыду і суіцыдальных спробаў. Большасць людзей папярэджваюць акружэнне аб сваім намеры ў той ці іншай форме, а дзеці ўвогуле не ўмеюць утойваць сваіх планаў, таму адгаворкі наконт “ніхто не мог і падумаць” сведчаць толькі аб тым, што навакольныя не зразумелі сігналаў.
Дзіця можа прама гаварыць аб суіцыдзе або разважаць аб бессэнсоўнасці жыцця, што без яго ў гэтым свеце будзе толькі лепш. Насцярожыць павінны фразы “ўсё надакучыла”, “ненавіджу ўсіх і сябе”, “калі ўсё гэта скончыцца”, “так жыць немагчыма”, а таксама разважанні аб пахаванні або пытанне, што б ты рабіў, калі б мяне не стала? Трывожнымі сігналамі з’яўляюцца і спробы раздаць даўгі, свае рэчы, асабліва са словамі, што яны больш не патрэбныя, памірыцца з ворагамі.
Для прафілактыкі суіцыдальных паводзінаў у непаўналетніх бацькам неабходна прытрымлівацца важных правілаў. Заўжды знаходзьце час выслухаць і адкрыта абмяркоўваць сямейныя і асабістыя праблемы дзяцей. Наладзьце цёплы эмацыйны кантакт, пастаянна нагадвайце, што вы любіце дзіця і яно важнае для вас.
Дапамагайце сваім дзецям ставіць рэальныя жыццёвыя мэты і ісці да іх. Шукайце канструктыўныя выхады з сітуацый. Будуйце сумесныя планы на будучыню. Не абясцэньвайце перажыванняў непаўналетніх:“няма чаго хвалявацца”, “гэта глупства”, бо страціце іх давер. Аказвайце эмацыйную падтрымку: выслухайце, абдыміце, будзьце шчырымі і адкрытымі, дзяліцеся сваімі пачуццямі і перажываннямі. Не забывайце заслужана хваліць сыноў і дачок – гэта паспрыяе іх здаровай самаацэнцы.
Выхаванне дзяцей – складаная і адказная задача, здараюцца сітуацыі, калі дарослым няпроста самастойна разабрацца з праблемамі. Калі спатрэбіцца прафесійная дапамога ці кансультацыя, можна звяртацца на тэлефон даверу 6-02-95 ці прыйсці ў сацыяльна-педагагічны цэнтр па адрасе: г. Дзятлава, вул. Кутузава, 3.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
