Маладыя і перспектыўныя

Нядаўна згулялі вяселле галоўны інжынер КСУП «Хвінявічы» Юрый Маслоўскі і дыспетчар гаспадаркі Алена (у дзявоцтве Марук).

Маладую сям’ю работнікаў гаспадаркі з адметнай падзеяй жыцця прыехалі павіншаваць старшыня раённага камітэта прафсаюза работнікаў аграпрамысловага комплексу Уладзімір Фёдаравіч Казак і першы сакратар раённага камітэта ГА «БРСМ» Кацярына Хілімончык. На мехдвары, у прысутнасці калегаў па рабоце, віншваннні і падарункі прымаў Юрый Маслоўскі.

Ад імя моладзі раёна Кацярына Хілімончык павіншавала маладажонаў з «нараджэннем сям’і», пажадала Юрыю і Алене моцнага здароўя, удачы ў справах, каб яны былі хлебасольнымі і дбайнымі гаспадарамі.
Уладзімір Фёдаравіч Казак звярнуўся да Юрыя з такімі словамі:

— Цудоўна, што вы жывяце і працуеце на сяле, стварылі новую сям’ю. Жадаю, каб яна была моцнай, каб вы паспяхова працавалі, раслі прафесійна. Шчасця і ўдачы вашай сям’і.

Старшыня КСУП «Хвінявічы» Мікалай Анатольевіч Бубноўскі вельмі сур’ёзна адносіцца да праблемы замацавання кадраў у сельскай гаспадарцы, уважліва ставіцца да моладзі, якая тут працуе. Пра маладажонаў ён расказаў наступнае.

— Юрый прыйшоў у нашу гаспадарку па размеркаванні пасля заканчэння Жыровіцкага тэхнікума. Адслужыў у арміі, скончыў Баранавіцкі ўніверсітэт, паспяхова працуе галоўным інжынерам.

Алена — мясцовая, у КСУП «Хвінявічы» шмат гадоў працуюць яе бацькі: бацька — механізатарам, маці — намеснікам галоўнага бухгалтара.

Маладая сям’я жыве ў двухпакаёвай кватэры, якую атрымала ад гаспадаркі. Яны перспектыўныя маладыя людзі, добрыя спецыялісты. Гэта надзейная маладая змена.

І. КАЎКЕЛЬ
Фота П. АДАМЧУКА