У 2024 годзе перад жывёлагадоўчай галіной Дзятлаўшчыны стаяла няпростая місія: утрымаць пазамінулагоднія рэкордныя паказчыкі і нарасціць тэмпы вытворчасці сельгаспрадукцыі. Нашы жывёлаводы справіліся з пастаўленымі кіраўніцтвам раёна задачамі і прадаўжаюць “дабаўляць” па многіх пазіцыях.
Аб выніках работы за год і ўпэўненым старце ў новы справаздачны перыяд расказала намеснік начальніка ўпраўлення – начальнік аддзела арганізацыі вытворчасці ўпраўлення сельскай гаспадаркі і харчавання райвыканкама Ірына Грыбінюкова:
– За апошнія гады Дзятлаўшчына істотна павысіла вынікі ў сферы жывёлагадоўлі і вытворчасці сельгаспрадукцыі. Сёння па ўсіх паказчыках мы ў дзясятцы абласнога рэйтынгу. Валавы надой па раёне – 74 985 тон малака, 112 % да ўзроўню 2023 года. Сярэдні надой малака на адну карову склаў 6915 кг (плюс 644 літры на карову да пазамінулага года). Нагадаем, што яшчэ зусім нядаўна, у 2021 годзе, ён складаў 4780 кг. Сельгаспрадпрыемствы-лідары перасягнулі знакавы сямітысячны рубеж: у ААТ “Граніт-Агра” надой на карову склаў 7977 кг – вышэйшы за сярэднеабласны паказчык (плюс 465 літраў), пасля адкрыцця новага малочнатаварнага комплексу на другім месцы ўпэўнена замацаваўся СГФ “АграМілк” – 7295 кг, тройку самых выніковых замыкаюць КСУП “Хвінявічы” – 7255 кг. За мінулы год таварнасць малака павысілася ў параўнанні з папярэднім годам і склала 92,1 %. Рэалізавана 68 997 тон (113 % да ўзроўню 2023 года): 66,9 % – гатункам “Экстра”, 25,3 % – вышэйшым. Больш за 90 % прадукцыі было пастаўлена на Дзятлаўскі філіял ААТ “Молочный Мир”.
– Што з’яўляецца рухавіком высокіх вынікаў?
– У ліку ключавых фактараў – мадэрнізацыя і паляпшэнне ўмоваў утрымання жывёл. Сёння 85 % пагалоўя кароў утрымліваецца на малочнатаварных комплексах з даільнымі заламі. У мінулым годзе на Дзятлаўшчыне ўведзены ў строй два малочнатаварныя комплексы – “Засецце-2” (СГФ “АграМілк”) і “Раготна” (ААТ “Дварэц-Агра”). Цяпер комплекс “Раготна”, які пачаў сваю работу ў снежні, укамплектоўваецца пагалоўем, дзякуючы чаму павялічацца вытворчыя вынікі. З пачатку года закуплены 15 цялушак, на працягу года будуць набыты яшчэ 200, у тым ліку ад КСУП “Хвінявічы”. Толькі пяць фермаў з 36 жывёлагадоўчых аб’ектаў раёна дагэтуль выкарыстоўваюць малакаправод, іх рэканструкцыя будзе праведзена ў бліжэйшыя два гады.
– Ці добра прайшла нарыхтоўка кармоў?
– Зацяжная цёплая восень паспрыяла эфектыўнай рабоце ў гэтым напрамку: да зімоўкі ўсе сельгаспрадпрыемствы Дзятлаўшчыны на 100 і больш працэнтаў забяспечылі сябе травянымі кармамі. Акрамя іх, у рацыён буйной рагатай жывёлы абавязкова ўключаюцца мінеральныя дабаўкі, шрот, камбікорм, якім гаспадаркі на пастаяннай аснове забяспечвае ААТ “Новаяльнянскі камбінат хлебапрадуктаў”.
– Якімі яшчэ дасягненнямі вызначылася жывёлагадоўля?
– Па выніках года выканалі абласное заданне па гадоўлі маладняку, дасягнуўшы лічбы ў 17 225 галоў (пры заданні 17 200). З пачатку мінулага года на 83 галавы павялічылася колькасць кароў малочнага напрамку. Стараннямі жывёлаводаў раёна за год на 48 грамаў павялічылася сярэднясутачная прывага і склала 675 грамаў. Найлепшы вынік паказалі СГФ “АграМілк” (745 грамаў), ААТ “Граніт-Агра” (726 грамаў), ААТ “Дварэц-Агра” (713 грамаў). Ва ўсіх гаспадарках раёна працуюць над тым, каб атрымаць большыя прывагі, выконваючы рацыёны, умовы догляду.
– Як спрацавалі іншыя галіны жывёлагадоўлі?
– На Дзятлаўшчыне, акрамя малочнага напрамку, актыўна развіваюцца авечкагадоўля і трусагадоўля, якімі займаюцца спецыялісты КСУП “Хвінявічы”. За справаздачны год павялічылася пагалоўе авечак, утрымалася на тым жа ўзроўні пагалоўе трусоў. Мясная прадукцыя рэалізуецца ў філіялы спажыўтаварыства і ўстановы грамадскага харчавання.
– Нарэшце, што самае важнае для поспеху ў жывёлагадоўчай галіне?
– У жывёдагадоўлі, магчыма нават больш, чым у іншых сферах дзейнасці, усё залежыць ад работнікаў, іх энтузіязму і стаўлення да сваіх абавязкаў. Шчырыя словы ўдзячнасці хачу выказаць усім людзям, занятым у гэтай галіне, за іх цярпенне, карпатлівую, вельмі складаную штодзённую круглагадовую працу. Усе высокія паказчыкі выконваюцца стараннямі ўсіх работнікаў: аператараў машыннага даення, даглядчыкаў, ветэрынарных дактароў, заатэхнікаў і іншых спецыялістаў. Паступова жывёлагадоўчая сфера “абнаўляецца” маладымі спецыялістамі, якія пераймаюць каштоўны вопыт старэйшых калег. У мінулым годзе на работу ў раён прыбылі два ветэрынарныя дактары і чатыры заатэхнікі – выпускнікі Ваўкавыскага ветэрынарнага каледжа. Пажадаем ім поспехаў у працы і любові да сваёй справы, якая абавязкова адлюструецца высокімі дасягненнямі.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
