21 чэрвеня ў Казлоўшчынскім лясніцтве, непадалёку ад дзіцячага лагера “Лясны” Слонімскага раёна, адбыўся лясны пажар. Ён быў выяўлены дзяжурным пры дапамозе сістэмы “Лясны Страж”.
На месцы была ўстаноўлена прычына ўзгарання: парывам ветру вывернула з коранем бярозу, якая ўдарыла па сасне, тая ўпала на лінію электраперадачы. У выніку абрыву проваду кароткага замыкання адбылося ўзгаранне. Работнікі Казлоўшчынскага лясніцтва і пажарна-хімічная станцыя лясгаса аператыўна патушылі пажар пасля адключэння электрычнасці Слонімскім РЭС.
Дзятлаўскі лясгас нагадвае, што інфармацыю аб забаронах на наведванне лясоў можна знайсці на афіцыйным сайце Міністэрства лясной гаспадаркі: www.mlh.by у раздзеле “Карта забарон і абмежаванняў на наведванне лясоў”. На ёй чырвоным колерам пазначаны рэгіёны, дзе на дадзены момант дзейнічае забарона на наведванне лясоў. Пры ўстанаўленні абмежавання (III клас пажарнай небяспекі) абмежавальныя меры прымаюцца персанальна для кожнага раёна адпаведнымі рашэннямі райвыканкама. Пры ўстанаўленні забароны на наведванне (IV, V клас пажарнай небяспекі) ЗАБАРАНЯЕЦЦА:
знаходжанне на тэрыторыі ляснога фонду (у тым ліку без транспартных сродкаў);
уезд на тэрыторыю ляснога фонду транспартных сродкаў,
за выключэннем транспарту юрыдычных асоб, якія вядуць лясную гаспадарку, і органаў, якія ажыццяўляюць кантроль у адпаведнасці з артыкулам 106 Ляснога кодэкса Рэспублікі Беларусь, а таксама сіл забеспячэння нацыянальнай бяспекі, пералічаных у Канцэпцыі нацыянальнай бяспекі Рэспублікі Беларусь;
правядзенне на тэрыторыі ляснога фонду работ, не звязаных з вядзеннем лясной гаспадаркі.
Калі вы бачыце агонь у лесе або побач, паведаміце ў дзяжурную службу Дзятлаўскага лясгаса па тэлефоне 8-01563-6-10-70, у найбліжэйшае лясніцтва або ў МНС па тэлефоне 101.
Адміністрацыя Дзятлаўскага лясгаса
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
