Людміла Радзевіч: “У Год добраўпарадкавання падарунак дарэчы”

Адбылося сумеснае пасяджэнне абласнога выканаўчага камітэта і сесіі абласнога Савета дэпутатаў, дзе падведзены вынікі сацыяльна-эканамічнага развіцця Гродзеншчыны і ва ўрачыстай абстаноўцы ўзнагароджаны тыя, хто летась дабіўся поспехаў у прафесійнай дзейнасці або стаў прызёрам абласнога конкурсу.

Граматы і статуэткі ад старшыні аблвыканкама Уладзіміра Караніка і старшыні абласнога Савета дэпутатаў Алены Пасюта атрымалі сёння старшыня Новаяльнянскага сельвыканкама Людміла Радзевіч і дырэктар Данілавіцкага дома культуры, яна ж стараста аграгарадка Круцілавічы Святлана Грос. Як памятаем, па выніках штогадовага конкурсу сярод органаў мясцовага самакіравання другое месца ў вобласці сярод сельскіх саветаў заняў Новаяльнянскі, а сярод старастаў населеных пунктаў такі ж вынік у Святланы Грос.

Сваімі ўражаннямі ад паездкі ў абласны цэнтр падзялілася Людміла Радзевіч, для якой гэты дзень быў адметны яшчэ і тым, што ўзнагароджанне супала з яе асабістым святам – днём нараджэння.

– У нас самыя станоўчыя эмоцыі, – расказала Людміла Аляксандраўна. – Вяртаемся дамоў з цудоўным настроем. Асабліва пачэсна і хвалююча было яшчэ і таму, што ў зале пасяджэнняў знаходзіліся такія важныя палітычныя дзеячы Беларусі, як Дзяржаўны сакратар Савета Бяспекі Аляксандр Вальфовіч, старшыня Камітэта дзяржаўнага кантролю Васіль Герасімаў, міністр фінансаў Юрый Селіверстаў, памочнік Прэзідэнта – інспектар па Гродзенскай вобласці Юрый Караеў.

Разам з узнагародамі наш сельскі выканаўчы камітэт атрымаў яшчэ і каштоўны падарунак – бензапілу. Мы вельмі ёй рады, бо сёлета – Год добраўпарадкавання, і гэты неабходны ў гаспадарчай дзейнасці інструмент абавязкова будзе запатрабаваны, тым больш што гарадскі пасёлак Наваельня славіцца сваімі соснамі, амаль заўжды ёсць патрэба ў выдаленні старых ці праблемных галін.

Адметна і тое, што паездка выпала на мой дзень нараджэння. Я даўно ведала, што наш сельсавет заняў прызавое месца, аднак, калі пачула, што ўзнагароджанне прызначана на маю асабістую дату, была прыемна здзіўлена. Заўжды радасна адправіцца ў дарогу, крыху пераключыцца, сустрэць уласнае свята не на працоўным месцы.  

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашалепшае #нашелучшее