На Дзятлаўшчыне прайшоў раённы злёт-конкурс юных інспектараў дарожнага руху. Арганізатарамі мерапрыемства сталі міжраённы аддзел ДАІ па абслугоўванні Слонімскага, Дзятлаўскага і Зэльвенскага раёнаў, аддзел адукацыі райвыканкама.
Каманды сабраліся ў сярэдняй школе № 1 горада Дзятлава імя А. М. Чурылы. Арганізатары павіталі ўдзельнікаў, яшчэ раз нагадалі правілы спаборніцтваў і пажадалі кожнаму праявіць сябе, паказаць тэарэтычныя і практычныя веды, кемлівасць, спрыт і творчыя здольнасці. Лепшая каманда будзе прадстаўляць Дзятлаўскі раён на абласным конкурсе ў горадзе Гродне.
Пасля жараб’ёўкі юныя інспектары дарожнага руху прыступілі да конкурсных этапаў. Яны прадэманстравалі веды па правілах дарожнага руху, аказанні першай медыцынскай дапамогі, паказалі сваё майстэрства ў фігурным кіраванні веласіпедам, а таксама творчыя здольнасці ў агітацыйна-мастацкім прадстаўленні і падрыхтоўцы тэматычных насценгазет, выпуск якіх быў дамашнім заданнем для каманд.
Супрацоўнікі ДАІ пасля падвядзення вынікаў адзначылі, што каманды паказалі добрыя веды ў тэарэтычных конкурсах і моцную падрыхтоўку ў практычных. Вядома, былі і памылкі, але дзяржаўтаінспектары выказалі спадзяванне, што на наступны год усе яны будуць выпраўлены. Заклікалі памятаць і прымяняць на практыцы правілы дарожнага руху.
У конкурсе “Фігурнае кіраванне веласіпедам” лепшымі былі навучэнцы з гімназіі № 1 і сярэдняй школы № 1 горада Дзятлава імя А. М. Чурылы, крыху саступілі ім юныя інспектары з Казлоўшчынскай сярэдняй школы, трэція – навучэнцы Хвінявіцкай сярэдняй школы і сярэдняй школы № 3 горада Дзятлава імя І. Ю. Філідовіча.
Самыя трывалыя веды правілаў дарожнага руху прадэманстравалі юныя інспектары з сярэдняй школы № 1 горада Дзятлава імя А. М. Чурылы і Хвінявіцкай сярэдняй школы, на другім месцы – знаўцы Казлоўшчынскай сярэдняй школы, на трэцім – каманды з першай і трэцяй гарадскіх школ.
У намінацыі “Агітацыйна-мастацкае прадстаўленне” першае месца аддалі навучэнцам Казлоўшчынскай сярэдняй школы, на другім месцы – сярэдняя школа № 1 горада Дзятлава імя А. М. Чурылы, на трэцім – каманда Хвінявіцкай сярэдняй школы.
Лепшыя веды па аказанні першай медыцынскай дапамогі паказала каманда Казлоўшчынскай сярэдняй школы, другое месца – у Новаяльнянскай сярэдняй школы імя А. А. Шаўчук, трэцяе – у гімназіі № 1.
Самую цікавую тэматычную насценгазету выпусцілі навучэнцы Казлоўшчынскай сярэдняй школы, на другой пазіцыі – Хвінявіцкая сярэдняя школа, трэцяе месца прысудзілі сярэдняй школе № 1 горада Дзятлава імя А. М. Чурылы.
Па выніках усіх пройдзеных іспытаў тытул чэмпіёнаў злёту-конкурсу атрымалі інспектары дарожнага руху Казлоўшчынскай сярэдняй школы, другое месца дасталося камандзе сярэдняй школы № 1 горада Дзятлава імя А. М. Чурылы, трэцяе – Хвінявіцкай сярэдняй школе.
Юныя інспектары дарожнага руху атрымалі дыпломы пераможцаў і прызёраў, памятныя падарункі.
Святлана ГРЫШЫНА
Фота арганізатараў
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
