Крымінальная хроніка

Адкрытая машына – адкрыты кашалёк

Раённы аддзел Следчага камітэта ўзбудзіў крымінальную справу з-за крадзяжу грошай. Яны зніклі з кашалька, які знаходзіўся ў незачыненай машыне. Гаспадар пазбавіўся грошай, калі неабачліва пакінуў без нагляду свой аўтамабіль, які прыпаркаваў на адной з вуліц гарадскога пасёлка Наваельня.

Замест прыбытку – страты

На працягу месяца наш зямляк, жыхар адной з вёсак раёна, спадзяваўся атрымаць матэрыяльны прыбытак з дапамогай інтэрнэту. Невядомы махляр, які, як пазней высветлілася, дзейнічаў з-за мяжы, падманным шляхам выманіў у пацярпелага 9640 рублёў і 250 долараў ЗША, нібыта для гандлю на біржы. Вясковец, даверыўшыся зламысніку, не толькі не дачакаўся прыбытку, але і застаўся без уласных грошай. Па факце махлярства ўзбуджана крымінальная справа.

На жанчыну – з кулакамі

Пракуратура Дзятлаўскага раёна ўзбудзіла крымінальную справу на хатняга агрэсара. У сваім доме мужчына пасварыўся з сужыцелькай. Адносіны высвятляў не толькі на словах, але і падняў на жанчыну руку. Згодна з заключэннем эксперта, пацярпелай нанесены менш цяжкія цялесныя пашкоджанні. Вінаваты паўстане перад судом.

Схапіў нож – патрабаваў грошы

Сваёй бабулі пагражаў нажом жыхар адной з вёсак нашага раёна, 1994 года нараджэння. Такім чынам унук вырашыў дабіцца ў пажылой жанчыны грошай з пенсіі. Здабыткам агрэсара сталі ўсяго пяць беларускіх рублёў. Затое вымагальнік “зарабіў” сабе на крымінальную справу.

У магазін за чужыя грошы

Раённы аддзел Следчага камітэта ўзбудзіў крымінальную справу на двух жыхароў нашага раёна. Яны скарысталіся перададзенай банкаўскай карткай свайго знаёмага. Мужчыны за чужыя грошы схадзілі ў магазін і набылі там тавару на 5 рублёў 5 капеек. Тлумачыць, чаму так зрабілі, вінаватым давядзецца ў судзе.

 

Аляксандр БІЛЬ,
начальнік аддзела ўнутраных спраў Дзятлаўскага райвыканкама