Конкурс селекцыянераў

Штогадовы раённы конкурс спецыялістаў па селекцыйнай рабоце з сельскагаспадарчымі жывёлінамі сёлета адбыўся ў СВК “Хвінявічы”

Канкурсанты, а гэта, як правіла, лепшыя спецыялісты па селекцыйнай рабоце, якія працуюць у сельгаспрадпрыемствах Дзятлаўшчыны, спаборнічалі ў трох намінацыях – тэхнікаў-асемянатараў, заатэхнікаў- селекцыянераў, звенняў па аднаўленні статку буйной рагатай жывёлы. Конкурсная камісія ў складзе дзевяці чалавек пад старшынством намесніка начальніка ўпраўлення сельскай гаспадаркі і харчавання райвыканкама В. Гранкоўскага ў канчатковай ацэнцы ўдзельнікаў спаборніцтва ўлічвала выніковасць іх работы ў сваіх гаспадарках у 2014 годзе, тэарэтычныя веды і практычныя ўменні пры выкананні заданняў конкурсу.

Пераможцай спаборніцтва  работнікаў па штучным асемяненні журы прызнала тэхніка-асемянатара СВК “Жукоўшчына” Н. Стэцкую, якая набрала 99 балаў. Другое месца падзялілі тэхнік-асемянатар СВК “Вензавец” С. Мацкевіч і тэхнік-асемянатар СВК “Граніт-Агра” А. Бандарэнка (па 98 балаў). Трэцяе месца прысуджана тэхніку-асемянатару СВК “Русь-Агра” А. Кароль (96 балаў).
У спаборніцтве заатэхнікаў-селекцыянераў перамогу атрымала спецыяліст СВК “Жукоўшчына” Л. Трышына (99 балаў). Другое месца прысуджана заатэхніку-селекцыянеру СВК “Вензавец” Т. Саўчук (97 балаў), трэцяе – заатэхніку-селекцыянеру СВК “Русь-Агра” Н. Пятраш (96 балаў).
Пераможцам спаборніцтва звенняў па аднаўленні статку буйной рагатай жывёлы журы назвала звяно СВК “Хвінявічы” (заатэхнік-селекцыянер І. Марук, галоўны ветэрынарны доктар І. Апанасік, тэхнік-асемянатар У. Бакшук). Звяно набрала 98 балаў.
Усе прызёры конкурсу адзначаны граматамі ўпраўлення сельскай гаспадаркі і харчавання райвыканкама і каштоўнымі падарункамі.
Спонсар конкурсу – Дзятлаўскі сырзавод – ушанаваў каштоўнымі падарункамі шматгадовую і сумленную працу  тэхніка-асемянатара СВК “Хвінявічы” Ю. Камінскага, галоўнага ветэрынарнага доктара СВК “Белагурна” К. Бузука, галоўнага ветэрынарнага доктара СВК “Войневічы” Б. Куляша.

Каштоўныя падарункі ад райкама прафсаюза работнікаў АПК за шматгадовую плённую працу атрымалі тэхнік-асемянатар СВК “Слава працы” У. Шалесны і тэхнік-асемянатар СВК “Жукоўшчына” Р. Паўлоўская.
Падарункам адзначана прафесійнае старанне маладога спецыяліста СВК “Граніт-Агра” В. Бакея.
Змястоўную лекцыю па актуальных праблемах селекцыйнай работы ўдзельнікам конкурсу прачытаў доктар навук, прафесар Гродзенскага аграрнага ўніверсітэта А. Глаз.
НА ФОТАЗДЫМКАХ: узнагароды за перамогу ў конкурсе ад першага намесніка старшыні райвыканкама, начальніка ўпраўлення райсельгасхарчу А. Гросса атрымлівае тэхнік-асемянатар СВК “Жукоўшчына” Н. Стэцкая; старшыня РК прафсаюза работнікаў АПК У. Казак уручае каштоўны падарунак тэхніку-асемянатару СВК “Жукоўшчына” Р. Паўлоўскай; перад удзельнікамі конкурсу з лекцыяй выступае прафесар А. Глаз; утрыманне маладняку буйной рагатай жывёлы на новай ферме “Парэчча” СВК “Хвінявічы”.
Тэкст і фота Б. ВАРНЫ