Да Дня праваслаўнай кнігі, які ў Беларусі адзначаецца 14 сакавіка, і 925-годдзя нараджэння Ефрасінні Полацкай у Дзятлаўскай раённай бібліятэцы адбылася гадзіна духоўнасці “Вечныя каштоўнасці праваслаўя”.
Сустрэча з удзелам клірыка сабора Святых навамучанікаў і спаведнікаў Царквы Рускай горада Дзятлава іерэя Аляксея Сцепановіча сабрала на адной пляцоўцы аматараў чытання, якія праз друкаванае слова імкнуцца прыйсці да мудрасці і ісціны.
Як было адзначана, Дзень праваслаўнай кнігі вяртае нас у 1564 год, калі пабачыла свет першае дакладна датаванае друкаванае выданне Івана Фёдарава “Апостал”. Яшчэ адной гістарычнай асобай, якую з асаблівай цеплынёй варта ўзгадаць у Год беларускай жанчыны, з’яўляецца Ефрасіння Полацкая – наша суайчынніца, якая была асветніцай і стаяла ля вытокаў нацыянальнай пісьменнасці, бо заснавала пры манастырах скрыпторыі – своеасаблівыя майстэрні па перапісванні кніг. Яна прыклад таго, як жаночая мудрасць і рашучасць здольныя змяніць лёс цэлага народа.
Ефрасінню Полацкую кананізавалі першай сярод усходнеславянскіх жанчын, і да нашага часу яна лічыцца заступніцай Беларусі.
– Сёння мы гаворым не толькі аб праваслаўнай, але і аб кнізе ўвогуле, яна – вялікі скарб, дадзены людзям, – зазначыў іерэй Аляксей Сцепановіч. – Чытаючы, чалавек прасвятляецца духоўна, а таксама спасцігае навукі, за кошт чаго ў духоўным плане становіцца бліжэйшым да Бога, у мірскім – больш адукаваным. Кніга прыйшла да нас не адразу, як і друкарства на Русь. З гэтай нагоды ўспамінаем дыякана Іаана Фёдарава, які першым пачаў друкаваць кнігі, а раней яны перапісваліся ўручную і пераважна для храмаў. Упрыгожваліся золатам, серабром, каштоўнымі камянямі, таму былі вельмі дарагія, доўга ствараліся. Калі Іаан Фёдараў заняўся друкарскай справай, ён зрабіў кнігу даступнай простым людзям, з-за чаго яму спрыяў мітрапаліт Макарый. Па першых друкаваных кнігах на Русі не толькі вялося богаслужэнне, але і вучылі грамату простыя людзі.
Як прыклад рарытэтнага выдання, айцец Аляксей паказаў прысутным “Апостал”, які разам з іншымі праваслаўнымі кнігамі, што пабачылі свет шмат гадоў таму, захоўваецца ў храме райцэнтра.
– Мітрапаліт Макарый не дажыў да выдання першай друкаванай кнігі, – прадоўжыў святар. – Таму перапісчыкі кніг, пабаяўшыся канкурэнцыі, спалілі друкарню. Іаан Фёдараў з вучнямі пераехаў у Літву, дзе прадоўжыў важную справу па развіцці кнігавыдавецтва.
Цяпер мы жывём у лічбавым свеце, у імгненне вока праз гаджэт можам знайсці любую інфармацыю, аднак важна не забываць і папяровыя кнігі. Калі іх чытаем, то насычаемся цялесна і наталяем сваю душу.
Усіх прысутных, а таксама жыхароў Дзятлаўскага раёна клірык заклікаў праз друкаваныя выданні далучацца да свету мудрасці, павышаць уласную адукаванасць, адпаведна – праслаўляць імя Бога.
Напрыканцы сустрэчы работнікі бібліятэкі яшчэ раз падкрэслілі, што справа Ефрасінні Полацкай прадаўжаецца, бо і праз шмат стагоддзяў на беларускай зямлі ёсць жанчыны, якія штодзень нясуць святло ведаў – настаўніцы, бібліятэкары, матулі і бабулі, якія праз добрую казку і лагоднае слова выхоўваюць у дзіцячых сэрцах любоў да бліжняга.
Скончылася свята на лірычнай ноце – пажаданнем, выказаным калісьці Ефрасінняй Полацкай: “Чытайце, і вочы вашай душы адкрыюцца”.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#нашелучшее #нашалепшае
