11 верасня ў кінатэатрах па ўсёй Беларусі праходзіць прэм’ерны паказ кінадылогіі “Нашы сімвалы” (нацыянальныя фільмы ў змешанай форме “Дзяржаўны сцяг Рэспублікі Беларусь”, “Дзяржаўны герб Рэспублікі Беларусь”) вытворчасці РУП “Нацыянальная кінастудыя “Беларусьфільм”. Прэм’ера прымеркавана да Дня народнага адзінства, які будзе адзначацца 17 верасня.
У кінатэатры “Спадарожнік” у Дзятлаве паглядзець новую стужку прыйшлі кіраўніцтва раёна, прадстаўнікі сілавых структур, работнікі прадпрыемстваў і арганізацый, грамадскіх аб’яднанняў.
Першая частка фільма расказвае пра стварэнне і гістарычнае развіццё Дзяржаўнага сцяга Рэспублікі Беларусь. Другая прысвечана Дзяржаўнаму гербу, яго значэнню і ролі ў фарміраванні нацыянальнай ідэнтычнасці.
Кінадылогія даследуе гісторыю і сімволіку сцяга і герба Рэспублікі Беларусь і прымушае задумацца аб тым, як сімвалы могуць аб’ядноўваць людзей, фарміраваць іх каштоўнасці і вызначаць будучыню.
Пасля прэм’еры дзятлаўчане падзяліліся сваімі ўражаннямі ад кінастужак.
Вадзім Бялятка, намеснік старшыні райвыканкама, старшыня РА ГА “Белая Русь”:
– Вельмі цікавыя і інфарматыўныя фільмы, бо кожны з нас, кожны беларус павінен ведаць не толькі сімвалы, але і тое, што яны абазначаюць. У дылогіі ўдала спалучаны мастацкія і дакументальныя элементы, таму не толькі старэйшаму пакаленню, але і дзецям будзе ўсё зразумела і запамінальна. Удвая сімвалічна тое, што гэтая прэм’ера арганізавана напярэдадні такога цудоўнага свята, як Дзень народнага адзінства.
Вольга Рагачова, начальнік ідэалагічнага аддзела райвыканкама:
– Глядзела фільмы з вялікай цікавасцю. Яны выконваюць важную асветніцкую місію, інфармацыя пададзена даступна, што робіць іх цікавымі для самай шырокай аўдыторыі. Адчуваеш сапраўдны гонар, калі разумееш, якая глыбокая гісторыя і сэнс стаяць за кожным элементам нашых сімвалаў. Моцнае і аб’ядноўваючае кіно. Яго адназначна варта паглядзець усёй сям’ёй – яно выхоўвае патрыятызм і пачуццё гонару за сваю краіну.
Таццяна Лазута, настаўніца сярэдняй школы № 3 горада Дзятлава імя І. Ю. Філідовіча:
– Фільмы спадабаліся. Нам не лішні раз было ўзгадаць пра стварэнне нашых дзяржаўных сімвалаў, пераасэнсаваць іх важнасць і значэнне ў жыцці кожнага беларуса. Цікава было даведацца пра кожны элемент у гербе, значэнне колераў у сцягу. Раю ўсім, пачынаючы са школьнікаў, паглядзець гэту кінадылогію, пастараюся паглядзець яе і са сваімі вучнямі.
Святлана ГРЫШЫНА
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#НАШАЛЕПШАЕ #НАШЕЛУЧШЕЕ
