Юрыдычная дапамога

26 чэрвеня адвакаты Рэспублікі Беларусь адзначаюць сваё прафесійнае свята­– Дзень утварэння адвакатуры, якая сёлета адзначае 100 гадоў.

У юрыдычнай кансультацыі Дзятлаўскага раёна ажыццяўляюць дзейнасць два адвакаты – Рамуальда Перажок і Эдзіта Перажок, якія аказваюць дапамогу пры вядзенні крымінальных, грамадзянскіх, адміністрацыйных спраў, пры складанні дакументаў прававога характару, вядуць асветніцкую работу сярод насельніцтва.

Адвакатамі аказваецца юрыдычная дапамога і за кошт сродкаў калегіі адвакатаў, рэспубліканскага і мясцовага бюджэтаў.

Бясплатна яна можа быць аказана:

істцам – пры складанні заяваў і вядзенні спраў у судах першай інстанцыі, звязаных з працоўнымі праваадносінамі, аб спагнанні аліментаў, пазбаўленні бацькоўскіх правоў;

удзельнікам і інвалідам Вялікай Айчыннай вайны, інвалідам баявых дзеянняў на тэрыторыі іншых дзяржаў – пры дачы вуснай кансультацыі па пытаннях, не звязаных з прадпрымальніцкай дзейнасцю;

грамадзянам – пры складанні заяваў аб устанаўленні факту атрымання заробку за канкрэтны перыяд у пэўным памеры для прызначэння пенсій, аб прызнанні грамадзяніна абмежавана дзеяздольным або не дзеяздольным;

інвалідам І і ІІ групы – пры дачы вуснай кансультацыі, якая не патрабуе азнаямлення з дакументамі;

малазабяспечаным аднаму з бацькоў у няпоўнай сям’і, які выхоўвае дзіця ва ўзросце да васямнаццаці гадоў, бацькам (усынавіцелям, удачарыцелям) у шматдзетных сем’ях –пры дачы вуснай кансультацыі, якая не патрабуе азнаямлення з дакументамі;

непаўналетнім – у іх інтарэсах;

бацькам (усынавіцелям, удачарыцелям, апекунам, папячыцелям) непаўналетніх – у інтарэсах іх непаўналетніх дзяцей;

пенсіянерам і інвалідам, якія знаходзяцца (пражываюць) ва ўстановах сацыяльнага абслугоўвання, якія ажыццяўляюць стацыянарнае сацыяльнае абслугоўванне, а таксама законным прадстаўнікам грамадзян, прызнаных судом недзеяздольнымі, – пры дачы кансультацыі па пытаннях, звязаных з забеспячэннем і абаронай правоў і законных інтарэсаў названых грамадзян;

цяжарным жанчынам – пры дачы вуснай кансультацыі па пытаннях, звязаных з нараджэннем дзіцяці;

іншым катэгорыям грамадзян – па рашэнні калегіі адвакатаў.

Адвакаты юрыдычнай кансультацыі Дзятлаўскага раёна