З Дварца ў Мінск

Канікулы – гэта самая доўгачаканая пара ў школьнікаў.  

І асабліва прыемна, калі гэты час запоўнены прыемнымі эмоцыямі і ўдзелам у конкурсах.

Па выніках завочнага тура Паліна Рыбак, навучэнка пятага класа Дварэцкай сярэдняй школы, атрымала запрашэнне для ўдзелу ў вочным туры V Міжнароднага фестывалю-конкурсу “Творчасць без межаў” у намінацыі “Мастацкае слова”.

Рэпетыцыі, праца над вобразам, паездка ў Мінск, удзел у конкурсе – усё гэта напоўніла восеньскія канікулы хваляваннем і чаканнем.

Фестываль-конкурс праходзіў у Нацыянальным цэнтры мастацкай творчасці дзяцей і моладзі. Разам са сваімі педагогамі Лідзіяй Жых і Вольгай Сямашка Паліна наведала выставу творчых работ дзяцей з усёй рэспублікі, якая пакінула шмат яркіх уражанняў.

Ва ўзроставай катэгорыі 10-13 гадоў выступала сямнаццаць канкурсантаў. Было вельмі складана не хвалявацца, не паддацца эмоцыям. Паліна на сцэне трымалася ўпэўнена і старалася спадабацца не толькі гледачам, але і журы.

Пасля падвядзення вынікаў конкурсу Дзіна Тыцюк, дацэнт кафедры мастацтва эстрады Беларускага дзяржаўнага ўніверсітэта культуры і мастацтваў, пастаянны член журы міжнародных конкурсаў-фестываляў сучаснага мастацтва дала рэкамендацыі педагогам па далейшай падрыхтоўцы дзяцей да конкурсу і падзялілася сваімі ўражаннямі аб удзельніках. Выступленне Паліны Дзіна Георгіеўна адзначыла ацэнкай удзевяць балаў з дзесяці магчымых, парэкамендавала больш праяўляць сваё “я”ў далейшых выступленнях.

Паліна прыняла рашэнне паспрабаваць свае сілы і ў наступным годзе. Для пачатку трэба пастарацца прайсці адборачны тур. У лютым 2020 года мяркуе прыняць удзел у раённым конкурсе “Таленты Прынёмання”.

Дыплом удзельніка V Міжнароднага фестывалю-конкурсу “Творчасць без межаў” – вялікае дасягненне не толькі ў творчай біяграфіі Паліны Рыбак, але і знакавая старонка ў летапісе школы.

 

Вольга СЯМАШКА,
выхавальнік Дварэцкай сярэдняй школы