Адно з самых любімых народных гулянняў беларусаў – Масленіца. Як кажуць: хто бліна не з’еў – той вясну праспаў. Сёлета на свяце ў горадзе Дзятлаве, якое праходзіла на стадыёне “Колас”, госці ад душы весяліліся, развітваліся са снежнай і марознай Зімой, сустракалі сонечную Вясну.
Дзеці і дарослыя актыўна прымалі ўдзел у народных гульнях, конкурсах, атракцыёнах, разам з артыстамі Дзятлаўшчыны і Карэліцкага раённага цэнтра культуры танцавалі, спявалі песні, вадзілі карагоды, ну і, вядома ж, частаваліся блінамі, ад разнастайнасці якіх проста вочы разбягаліся: дранікі і блінчыкі розных памераў і колераў, з прыпёкамі і начынкамі, цэлыя кампазіцыі, якім гаспадыні прыдумалі крэатыўныя назвы.
Усе кулінарныя шэдэўры былі па заслугах ацэнены конкурснай камісіяй і гасцямі свята, якія маглі пачаставацца на любым з трынаццаці “падворкаў”. У конкурсе на лепшыя масленічныя бліны перамога сёлета дасталася Дзятлаўскаму раёну электрычных сетак, дыплом 2-й ступені атрымала сярэдняя школа № 1 горада Дзятлава імя А. М. Чурылы, дыплом 3-й ступені – у КСУП “Жукоўшчына”.
Самым незвычайным на свяце быў аб’яўлены конкурс на лепшы масленічны касцюм, у якім спаборнічалі ў трох намінацыях. Званне “Галоўны блін раёна” за самы эфектны вобраз прысудзілі Цэнтру сацыяльнага абслугоўвання насельніцтва Дзятлаўскага раёна, “Блін з разынкай” за самы крэатыўны і незвычайны падыход да дызайну падрыхтавала каманда сярэдняй школы № 3 горада Дзятлава імя І. Ю. Філідовіча, у намінацыі “Блінны рух” – за самую энергічную і масавую групу падтрымкі – перамогу прысудзілі Дзятлаўскаму РУП ЖКГ.
Шмат жадаючых выпрабаваць поспех, запусціўшы “снарад” на рэкордную дыстанцыю, сабраў сёлета конкурс на кіданне валёнкаў, які праводзіўся у Дзятлаве ўпершыню, але прыйшоўся ўсім даспадобы. Далей за ўсіх кінулі валёнак Наталля Галуза і Віктар Паўловіч.
У спартыўна-забаўляльнай праграме сярод арганізацый раёна выпрабоўвалі сілы шэсць каманд. Удзельнікі конкурсаў паказалі хуткасць і спрыт у пераносцы бліноў на лапатах; згуртаванасць каманды – у конкурсах лыжнікаў, на “мудрагелістай пераправе”; трапнасць – у дартсе і хакейным турніры. Па выніках агульнага заліку за ўсе віды спаборніцтваў пераможцам міні-спартакіяды, як і ў мінулым годзе, стала каманда Дзятлаўскага РУП ЖКГ, на другім месцы – спартсмены Дзятлаўскага лясгаса, на трэцім – калектыў ТАА “Ізакам”.
А напрыканцы ўдзельнікі свята правялі традыцыйны народны абрад – спальванне пудзіла Масленіцы, каб разам з агнём згарэлі ўсе крыўды, хваробы і беды.
Сёння Масленіца па зямлі ідзе,
Вясну-красну за сабой вядзе!
Святлана ГРЫШЫНА
Фота Наталлі АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#нашелучшее #нашалепшае
