Гатоўнасць нумар адзін

З 1 красавіка ў Беларусі пачынаецца пажаранебяспечны перыяд. Яму папярэднічаюць агляды-праверкі лясной аховы, якія праходзяць ва ўсіх лясніцтвах Дзятлаўшчыны.

Інспектаванне Казлоўшчынскага вопытна-вытворчага лясніцтва правялі дырэктар Дзятлаўскага лясгаса Сяргей Дурко, галоўны ляснічы Юрый Мамедаў, інжынер па ахове і абароне лесу Міхаіл Карэнка.

Мэта гэтага мерапрыемства – падрыхтаваць лясную ахову да работы ў пажаранебяспечны перыяд ва ўмовах павышанай гатоўнасці і пільнасці. Папярэдне было праведзена каля 100 гадзінаў тэхнічнай вучобы лясной аховы, цяпер надышоў час экзамену.

– Кожны супрацоўнік лясной аховы, а таксама спецыяльная тэхніка ў поўным яе арсенале павінны быць гатовыя для работы ў любой экстрэмальнай сітуацыі, – адзначыў дырэктар лясгаса Сяргей Дурко.

Інспектараў цікавіла ўкамплектаванасць пункта супрацьпажарнага інвентара, работа сродкаў маніторынгу, спраўнасць пажарнай тэхнікі, а таксама наяўнасць спецыяльнай формы, нагрудных знакаў і неабходных дакументаў.

На тэрыторыі лясніцтва ўстаноўлена і функцыянуе сістэма відэакантролю за лясным фондам: спецыяльная камера, усталяваная на вышыні, здольная “праглядваць” тэрыторыю дыяметрам да 25 кіламетраў. За данымі з камеры відэаназірання ў пажаранебяспечны перыяд пастаянна сочыць дзяжурны работнік лясной аховы. Акрамя таго, практычна ўсе транспартныя сродкі лясніцтва аснашчаны сістэмай унутранага радыёапавяшчэння. На “ўзбраенні” ў Казлоўшчынскім лясніцтве – спецыяльная ўніверсальная машына для тушэння лясных пажараў МЛ-10 (дарэчы, на Гродзеншчыне такая ёсць толькі ў Дзятлаўскім і Гродзенскім лясгасах). Машына можа даставіць да месца ляснога пажару сем чалавек, паўтары тоны вады. Тэхніка мае сістэму паліву і прычэпныя дыскі, якія могуць адразу пракладваць мінералізаваную паласу, якая спыняе распаўсюджванне агню.

– Ахова лесу, важная, але не адзіная сфера дзейнасці лясной гаспадаркі. З надыходам вясны для нас пачынаецца актыўная праца. Цяпер рыхтуемся да пасадкі лясных культур на плошчы больш за 60 гектараў, для гэтага ўжо падрыхтаваны і ўзгоднены праекты, таксама на тэрыторыі лясніцтва закладзены пяць новых парнікоў для вырошчвання пасадачнага матэрыялу, у якіх бліжэйшым часам будзе ўсталявана сістэма паліву і ўнесена насенне хваёвых культур, яны ў новым сезоне папоўняць лясны фонд раёна, – падзяліўся планамі на будучыню ляснічы Казлоўшчынскага лясніцтва Аляксей Дубовік.

Наталля АВЯРЧУК