Пра гэта расказала галоўны спецыяліст упраўлення па працы, занятасці і сацыяльнай абароне райвыканкама Наталля Чарняк:
– Шматдзетныя сем’і могуць выкарыстоўваць сродкі сямейнага капіталу на аплату сярэдняй спецыяльнай або вышэйшай адукацыі ў дзяржаўных установах адукацыі, а таксама ў навучальных установах спажывецкай кааперацыі і Федэрацыі прафсаюзаў Беларусі.
Пры гэтым варта памятаць некаторыя нюансы. Скарыстацца сродкамі можна датэрмінова, не чакаючы 18-годдзя дзіцяці, якое дало права на прызначэнне сямейнага капіталу. Аплаціць можна навучанне членаў сям’і: бацькоў, дзяцей, мужа, жонкі. Таксама скіраваць сродкі можна на першую, другую, наступныя адукацыі; аплачана можа быць любая форма атрымання: дзённая, завочная, дыстанцыйная.
Каб аформіць аплату за навучанне, неабходна сабраць пакет дакументаў:
пашпарты заяўніка і навучэнца;
пасведчанне аб нараджэнні навучэнца;
рашэнне (яго копію) аб прызначэнні сямейнага капіталу;
дагавор з навучальнай установай;
даведку, што дзіця (ці адзін з бацькоў) з’яўляецца студэнтам (навучэнцам);
пасведчанне аб заключэнні шлюбу;
дакументы аб занятасці мужа і жонкі ў поўнай сям’і або аднаго з бацькоў у няпоўнай.
Дакументы падаюцца ў службу “адно акно” райвыканкама па адрасе: г. Дзятлава, вул. Чырвонаармейская, 21.
Пасля прыняцця рашэння аб датэрміновым распараджэнні сродкамі сямейнага капіталу неабходна будзе звярнуцца ў ААТ “ААБ “Беларусбанк” для пералічэння сродкаў на рахунак навучальнай установы. Тэрмін разгляду заяваў і вынясення рашэння райвыканкама – да аднаго месяца, пералічэння грошай у банк – 31-41 дзень.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
