Маніторынг закінутых калодзежаў, прафілактыка выпальванняў расліннасці і крадзяжоў у АПК, планы па рамонтах установаў адукацыі да новага навучальнага года, падкормка шматгадовых траў, падрыхтоўка кормаўборачнай тэхнікі – на гэтыя і іншыя тэмы гаварылі на нарадзе ў старшыні райвыканкама Андрэя Садоўскага.
Халадовая хваля – ненадоўга
Сельская гаспадарка раёна на мінулым тыдні актыўна ўключылася ў пасяўную кампанію. Як адзначыў старшыня райвыканкама, усе падрыхтоўчыя работы праведзены своечасова, таму сяўба пройдзе хутка і амаль незаўважна. Невялікі прыпынак у сувязі з пахаладаннем не нясе ніякай пагрозы ў рабоце аграрыяў.
– Сканцэнтравацца сёння ўжо неабходна на падкормцы шматгадовых траў, падсеве аднагадовых, назапашванні арганічных угнаенняў, падрыхтоўцы кормаўборачнай тэхнікі, – падкрэсліў Андрэй Садоўскі.
Абнаўляюцца нашы школы
Абмеркавалі на нарадзе падрыхтоўку ўстановаў адукацыі Дзятлаўшчыны да пачатку 2025-2026 навучальнага года. Ужо да 10 красавіка будзе сфарміравана раённая камісія па вызначэнні спраў і неабходных мерапрыемстваў па падрыхтоўцы школ, а да 5 мая вызначаны план мерапрыемстваў. Традыцыйна асноўныя рамонтныя работы прыпадуць на летнія месяцы, аднак, акрамя гэтага, ужо сёння выдзелены бюджэтныя грашовыя сродкі ў памеры 515 тысяч рублёў для другога пускавога комплексу капітальнага рамонту даху сярэдняй школы № 3 горада Дзятлава імя І. Ю. Філідовіча, 570 тысяч рублёў – для капітальнага рамонту даху гімназіі № 1 райцэнтра. Таксама сёлета будзе адрамантаваны дах Гезгалаўскай школы, вядуцца работы па вызначэнні будаўнічай падраднай арганізацыі.
Крадуць нахабна і бязбожна
На крадзяжах у сферы аграпрамысловага комплексу спыніліся больш падрабязна. Зводкі апошняга тыдня сведчаць аб тым, што надышоў час “засучыць рукавы” праваахоўнікам, паколькі перыяд работы ў палях звязаны з выкарыстаннем, а разам з ім, на жаль, і раскраданнем гаруча-змазачных матэрыялаў, мінеральных угнаенняў, фунгіцыдаў і іншых рэчаў.
На мінулым тыдні дзве крымінальныя справы ўзбуджаны ў адносінах да вадзіцеля аднаго з сельгаспрадпрыемстваў раёна, у якога па месцы жыхарства знойдзены 210 літраў афарбаванага бензіну, 20 літраў афарбаванага дызпаліва, 80 літраў бензіну АІ-92, 10 літраў маторнага масла, 130 літраў фунгіцыдаў, гербіцыдаў, мінеральных угнаенняў. Як далажыў начальнік аддзела ўнутраных спраў райвыканкама Вадзім Шчурскі, кошт некаторых хімічных прэпаратаў, скрадзеных у гаспадарцы, складае больш за тысячу рублёў за упакоўку. Па дадзеным факце праводзіцца праверка.
Фігурантамі яшчэ адной справы стала сямейная пара, якая працуе на адной з малочнатаварных фермаў. Дома ў іх выяўлена і канфіскавана 120 кілаграмаў зерня і 82 кілаграмы мукі. Таксама праводзіцца праверка.
Андрэй Садоўскі адзначыў, што гэта рэзанансныя справы, будзе праведзена і дадаткова праверка сіламі ўпраўлення сельскай гаспадаркі і харчавання райвыканкама, як наладжана ў сельгаспрадпрыемствах Дзятлаўшчыны сістэма кантролю за спісаннем гаруча-змазачных матэрыялаў, выдачай хімічных прэпаратаў, мінеральных угнаенняў і ўвогуле за захаваннем матэрыяльных каштоўнасцей.
“За бяспеку разам”
Разам з ратаўнікамі. З панядзелка пачалася прафілактычная акцыя пад такой назвай. Доўжыцца яна будзе па 4 красавіка. Акрамя раённага аддзела па надзвычайных сітуацыях, які выступае ініцыятарам, у акцыі прымаюць удзел шэраг іншых ведамстваў. Як патлумачыў начальнік Дзятлаўскага РАНС Сяргей Казушчык, намаганні спецыялістаў будуць накіраваны на папярэджанне надзвычайных сітуацый і пажараў з-за выпальвання сухой травы, а таксама ў жылых будынках і збудаваннях. Дарэчы, акрамя таго, запланавана актыўная тлумачальная работа аб наступствах пакідання дзяцей без нагляду і злоўжывання спіртнымі напоямі. Акцэнт зроблены і на неабходнасці мэтанакіраванай работы па павышэнні ўзроўню бяспекі домаўладанняў адзінокіх пажылых грамадзян і інвалідаў.
Таксама ўсім старшыням сельскіх выканаўчых камітэтаў пастаўлена задача пастаяннага маніторынгу закінутых калодзежаў у населеных пунктах. Незачынены, паўразбураны калодзеж або іншае тэхнічнае збудаванне, якое ўяўляе патэнцыйную небяспеку, – гэта пастка, якая можа каштаваць жыцця, нельга пакідаць без увагі.
Ірына КАМАРОВА
#власть
