Дварэцкая бібліятэка – прызёр рэспубліканскага конкурсу

29 лістапада бібліятэкар Дварэцкай сельскай бібліятэкі сямейнага чытання Алена Казлова прыняла ўдзел у цырымоніі ўзнагароджання пераможцаў IV Рэспубліканскага конкурсу “Бібліятэка – цэнтр духоўнай асветы і выхавання”.

Мерапрыемства праходзіла ў рамках IV Беларускіх Калядных чытанняў у Нацыянальнай бібліятэцы Беларусі. Дварэцкая бібліятэка заняла другое месца сярод гарадскіх і раённых бібліятэк у намінацыі “Сям’я – наследніца маральных і духоўных каштоўнасцей”.

У бібліятэку ўсёй сям’ёй ходзіць не адно пакаленне бацькоў і дзяцей. Менавіта ў сям’і адбываецца выхаванне асобы дзіцяці. І без чытання тут не абысціся. Таму неабходна папулярызацыя сямейнага чытання, адраджэнне яго традыцый і асноў. Гэта і стварыла падставу для распрацоўкі ў 2017 годзе бібліятэчнай мэтавай праграмы “Сям’я і кніга”, якая скіравана на фарміраванне станоўчага іміджу чытаючай сям’і, далучэнне бацькоў і дзяцей да чытання, адраджэнне традыцый сямейнага чытання.

Імкнучыся прыцягнуць увагу чытачоў, Дварэцкая бібліятэка выкарыстоўвае новыя формы работы і ўдасканальвае традыцыйныя. Тут выдзелены куток сямейнага чытання, наладжана выдавецкая дзейнасць (буклет “Сям’я і кніга: аб’яднаныя чытаннем”, “7 цудаў Дварэцкай зямлі”), ладзіліся кніжныя выставы і агляды літаратуры, арганізавана сустрэча з сям’ёй ветэрана “Лёсы, апаленыя вайной”, праведзены Дзень інфармацыі ”Кніга. Сям’я. Бібліятэка”.

Віншуем бібліятэку з перамогай і жадаем далейшых поспехаў!

Марына БОРТКА,
метадыст Дзятлаўскай раённай бібліятэкі