Член Савета Рэспублікі Нацыянальнага сходу Рэспублікі Беларусь, дэпутат Гродзенскага абласнога Савета дэпутатаў Андрэй Жамойда правёў прыём грамадзян і прамую тэлефонную лінію ў Дзятлаве.
Таксама парламентарый пазнаёміўся з аб’ектамі добраўпарадкавання ў райцэнтры, “дакрануўся” да духоўнай спадчыны раёна.
Разам са старшынёй райвыканкама Андрэем Садоўскім яны праінспектавалі ход рамонтных работ на даху гімназіі № 1 горада Дзятлава, якія вядзе ТАА “Зодчий” (г. Слонім).
– Прыемна бачыць, што толькі нядаўна мінулі выпускныя вечары, а ва ўстановах раёна ўжо пачалася падрыхтоўка да новага навучальнага года. Прэзідэнт краіны Аляксандр Лукашэнка неаднаразова даваў даручэнні стварыць камфортныя, добразычлівыя ўмовы для навучальнага працэсу, і гэта актыўна рэалізуецца на Дзятлаўшчыне, – адзначыў сенатар. – Не менш важным для школьнікаў з’яўляюцца вопыт і кампетэнтнасць педагогаў, якія даюць трывалыя веды і рыхтуюць іх да паступлення на абраныя спецыяльнасці. Ужо ў жніўні у гэтай справе да вопытных настаўнікаў далучацца маладыя спецыялісты – выпускнікі педагагічных ВНУ і каледжаў.
Андрэй Садоўскі запрасіў дэпутата прагуляцца па горадзе, расказаў, як у Год добраўпарадкавання пераўвасабляецца Дзятлава. Кіраўнік раёна і парламентарый спыніліся каля фантанаў, адкрытых у мінулым годзе і сёлета, пагаварылі аб тым, якім чынам арганізуецца адпачынак дзятлаўчан каля вады і ў гарадскіх лакацыях.
Сенатар меў магчымасць пазнаёміцца з духоўна-асветніцкай дзейнасцю праваслаўнай канфесіі на Дзятлаўшчыне ў час экскурсіі ў храмы райцэнтра – Сабор святых навамучанікаў і спаведнікаў Царквы Рускай і Спаса-Прэабражэнскай царквы. Клірык сабора Аляксей Сцепановіч расказаў гасцям, як узводзіўся сабор. Разам абмеркавалі супрацоўніцтва царквы і дзяржавы, значэнне веры ў духоўным і патрыятычным выхаванні падрастаючага пакалення. Словы ўдзячнасці святар выказаў кіраўніцтву раёна за рэальныя справы ў падтрымку храмаў.
– Адметна, што ў нашай краіне створана прававое поле, у якім рэлігійныя арганізацыі могуць дзейнічаць і развівацца, а грамадзянам гарантуюцца іх канстытуцыйныя правы на свабоду сумлення і веравызнання. У новай рэдакцыі Закона “Аб свабодзе сумлення і рэлігійных арганізацыях”, якая пабачыла свет у мінулым годзе, улічаны пажаданні і прапановы аб магчымасці Царквы эфектыўна ажыццяўляць асветніцкую, духоўна-маральную дзейнасць, сацыяльнае служэнне. Відавочна, што ўсё гэта дзейнічае ў Дзятлаўскім раёне на ўзроўні традыцый, што не можа не радаваць, – падвёў вынік сустрэчы Андрэй Жамойда.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#Дятловщина #власть #нашелучшее #нашалепшае
