Дапамога побач. У птушынай сталовай пабывалі качкі

Навучэнцы школ горада Дзятлава ўсё больш актыўна падключаюцца да раённай акцыі “Птушыная сталовая”. Цяпер яны кормяць не толькі птушак, якія прылятаюць да кармушак, развешаных каля ўсіх школ. Дзеці прыходзяць з кормам на рэчку, што працякае ў цэнтры горада, каб дапамагчы качкам, якія там жывуць. Птушкам такой снежнай і марознай зімой прыходзіцца вельмі цяжка, бо баяцца яны не столькі холаду, як страшней для іх застацца без ежы.

Каардынатар раённага валанцёрскага клуба Ірына Мішчанка, якая прыйшла разам з навучэнцамі і настаўнікамі, адзначыла, што акцыя вельмі карысная не толькі для крылатых сяброў, але і для школьнікаў.

– Неабходна прывучаць дзяцей клапаціцца пра птушак і жывёл, калі ім асабліва цяжка, быць спагадлівымі да слабейшых. У нас складзены графік па падкормцы птушак для гарадскіх школ, і навучальныя ўстановы па чарзе будуць падтрымліваць качак на рэчцы і возеры ў гарадскім парку, – дадала Ірына Анатольеўна.

Удзельнікі школьнага лясніцтва сярэдняй школы № 3 горада Дзятлава імя І. Ю. Філідовіча падзяліліся, што з ахвотай пагадзіліся паўдзельнічаць у акцыі. Дарэчы, многія і дома арганізавалі птушыныя сталовыя. Навучэнцы запэўнілі, што будуць і далей падкормліваць сваіх крылатых сяброў.

Святлана ГРЫШЫНА

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga