На працягу двух апошніх дзесяцігоддзяў у нас распаўсюдзіліся розныя харчовыя прыхільнасці, сярод якіх пераважае вегетарыянства.
Радыкальныя формы вегетарыянства заклікаюць, напрыклад, да сыраядзення (толькі раслінная і неапрацаваная ежа) ці “фруктарыянства” (толькі сырыя фрукты).
– Несумненна, пэўныя плюсы ў вегетарыянства ёсць, і заключаюцца яны ў тым, што ў расліннай ежы змяшчаецца шмат вітамінаў, мінералаў, фітанцыдаў, клятчаткі. Лёгкасць пераварвання большасці прадуктаў станоўча ўплывае на нашу стрававальную сістэму, – расказвае доктар-тэрапеўт Дзятлаўскай ЦРБ Наталля Жых. – Разам з тым у вегетарыянстве існуюць і негатыўныя моманты.
Найперш, гэта незбалансаванасць харчавання. У рацыёне пераважаюць вугляводы, зусім мала бялку і тлушчоў, якія неабходны арганізму. Раслінны бялок засвойваецца горш, чым жывёльны, і не змяшчае ўсіх патрэбных нам амінакіслот, якія ў норме мы атрымліваем з мяса. Вегетарыянства тоіць небяспеку развіцця жалезадэфіцытнай анеміі, бо жалеза, якое змяшчаецца ў расліннай ежы, не так добра засвойваецца. Адсутнасць вітамінаў В12 і В2 можа прывесці да развіцця захворванняў нервовай сістэмы, дэпрэсіі і трывогі. У выніку недахопу вітаміну D у дзяцей развіваецца рахіт, а ў дарослых – астэапароз, разбураецца косная тканка зубоў. Назіраецца дэфіцыт такіх мікраэлементаў, як кальцый, ёд, цынк.
Юлія БАКУНОВІЧ
