У грамадстве сустракаюцца людзі, здольныя груба парушаць правілы.
Такія ўчынкі маюць свае наступствы. І ёсць нагода паразважаць аб праблеме хуліганства. Небяспека хуліганства заключаецца ў тым, што сваімі дзеяннямі агрэсар груба парушае грамадскі спакой і недатыкальнасць грамадзян, наносіць шкоду іх здароўю або маёмасці.
Сёлета адбылося пасяджэнне суда Дзятлаўскага раёна, на якім быў вынесены прысуд ураджэнцу Украіны Ш. – хулігану, які беспрычынна нанёс шкоду здароўю маладому дзятлаўчаніну. Агрэсара, які мае від на жыхарства ў Рэспубліцы Беларусь, прызналі вінаватым у наўмысных дзеяннях, што груба парушылі грамадскі парадак і суправаджаліся выкарыстаннем гвалту. Суд назначыў абвінавачанаму пакаранне ў выглядзе пазбаўлення волі на чатыры гады і шэсць месяцаў з адбываннем у папраўчай калоніі ва ўмовах узмоцненага рэжыму.
Жнівеньскай ноччу 2019 года п’яны грамадзянін Ш. паспрабаваў пазнаёміцца з дзвюма жанчынамі ў бары райцэнтра “Дзядзя Ваня”. Незнаёмкам ён настойліва прапаноўваў пайсці да яго на кватэру, аднак беспаспяхова. У хуткім часе жанчыны вырашылі прадоўжыць вечар на дыскатэцы ў кінатэатры “Спадарожнік”. Нешчаслівы кавалер накіраваўся за імі ўслед са шкляной бутэлькай піва ў руках. Каля кінатэатра жанчыны сустрэлі знаёмага хлопца К., якога папрасілі застацца побач, каб пазбавіцца ад надакучлівага незнаёмца. Але п’яны кавалер не здаваўся і прадаўжаў дамагацца ўвагі да сваёй асобы. Скарыстаўшыся бутэлькай піва ў якасці зброі, Ш. без папярэджання нанёс удар хлопцу па галаве. У выніку пацярпелы атрымаў рэзаныя раны галавы і твару. Пакуль хлопец прыходзіў у сябе, хуліган пастараўся ўцячы ад работнікаў міліцыі, якія дзяжурылі на дыскатэцы, але быў затрыманы імі.
Варта зазначыць, што Ш. раней не быў судзімы, ён жанаты, мае на ўтрыманні непаўналетняе дзіця. У судзе сваю віну прызнаў поўнасцю. Трэба ведаць, што алкагольнае ап’яненне, згодна з заканадащствам, не змякчае віны, а, наадварот, абцяжарвае яе. Таму п’яныя ўчынкі і неабдуманыя паводзіны могуць прывесці за краты, а крымінальная адказнасць за хуліганства надыходзіць з чатырнаццаці гадоў.
Ірына ЗАБЕЛІНА,
памочнік пракурора Дзятлаўскага раёна
