Аляксандр Бараноўскі: “Адказы на ўсе самыя важныя пытанні”

У саставе дэлегацыі Дзятлаўскага раёна, якая прысутнічала ў ліку звыш 2,5 тысячы чалавек у Палацы Рэспублікі на выступленні Прэзідэнта Беларусі Аляксандра Лукашэнкі са штогадовым Пасланнем беларускаму народу і парламенту, быў старшыня Дзятлаўскага раённага Савета дэпутатаў Аляксандр Бараноўскі, які падзяліўся ўражаннямі ад пачутага:

– Як і раней, Аляксандр Рыгоравіч у Пасланні даў адказы на ўсе самыя важныя пытанні, якія хвалююць суайчыннікаў. Ужо на пачатку пасяджэння ён паабяцаў выказаць “канцэнтраваны” погляд на сітуацыю ў краіне і за яе межамі, адказаць на пытанні. Тэма прамовы была выбрана самая актуальная: “Умовы захавання суверэнітэту і незалежнасці”, бо гэта пытанне, як ніколі ў навейшай гісторыі, набыло вострае гучанне. Раскрыць яе, безумоўна, стала магчымым толькі праз аналіз абстаноўкі на сусветнай арэне і ў суседняй Украіне. Па-ранейшаму беларускі лідар упэўнены, што, каб гэты канфлікт не стаў катастрофай, не ператварыўся ў трэцюю сусветную вайну, вырашаць яго неабходна за сталом мірных перамоваў, прычым без папярэдніх умоваў і “дыктоўкі” з боку Захаду.

Абазначыў Прэзідэнт і галоўныя ўмовы, выканаўшы якія наша Беларусь можа выстаяць у гэты няпросты перыяд. Сярод іх – народнае адзінства, захаванне гістарычнай памяці і нацыянальных традыцый, канкурэнтаздольная эканоміка, сацыяльная справядлівасць, незалежная знешняя палітыка.

Што нямала важна для нас, жыхароў невялікага раёна, шмат увагі Аляксандр Рыгоравіч надаў неабходнасці развіцця рэгіёнаў. Ён падкрэсліў, што яно павінна быць справядлівым і збалансаваным, бо нездарма Беларусь – гэта “сем Я” – шэсць абласцей і сталіца. Заявіў і аб новым падыходзе ў падтрымцы рэгіёнаў: чым далей ад Мінска, тым больш будзе льгот і прэферэнцый. Разам з тым кіраўнік дзяржавы ўпэўнены, што “не можа быць і гаворкі аб развіцці рэгіёнаў без татальнай дэбюракратызацыі і цыфравізацыі”. Скіраваў увагу прысутных і на важнасць павышэння ролі дэпутацкага корпусу, органаў мясцовага самакіравання, улады на месцах у прыняцці рашэнняў на карысць развіцця мясцовай інфраструктуры. Выказаўся, што прыцягваць да гэтага працэсу варта і насельніцтва, жыхароў невялікіх гарадоў і вёсак: дзе неабходна, дапамагчы чалавеку, а дзе трэба – прымусіць яго ліквідаваць безгаспадарлівасць, навесці парадак на зямлі, асабліва прысядзібных участках і дваравых тэрыторыях.

Увогуле ж, як падкрэсліў Аляксандр Лукашэнка, тэме сацыяльнай абароненасці насельніцтва ў Беларусі па-ранейшаму будзе надавацца самая пільная ўвага. Гэта тычыцца многіх кірункаў – даступнай медыцыны і адукацыі, стрымлівання росту цэн, будаўніцтва жылля, забеспячэння рабочымі месцамі, іншага.

Скончыць сваё выказванне хачу класічнай фразай беларускага лідара, якую ён часта выкарыстоўвае і якая прагучала і на гэты раз: “Як будзем жыць – залежыць толькі ад нас”. Думаю, гэта галоўнае кіраўніцтва да дзеяння для кожнага беларуса, які любіць сваю Айчыну і імкнецца рабіць яе паспяховай, прыгожай, шчаслівай, канкурэнтаздольнай у свеце.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga