Аб праекце мадэльнага закона СНД па абарачэнні каштоўных папер

Член Савета Рэспублікі Нацыянальнага сходу Рэспублікі Беларусь Павел Ашурык прыняў удзел у пасяджэнні рабочай групы Міжпарламенскай асамблеі дзяржаў-удзельніц Садружнасці Незалежных Дзяржаў па распрацоўцы праекта мадэльнага закона “Об стимулировании обращаемых инфраструктурных долговых обязательств”, якая праходзіла ў Санкт-Пецярбургу.

– Сам па сабе інстытут інфраструктурных аблігацый у шырокім разуменні для нашай краіны не з’яўляецца новым. Аднак, як у нас, так і ў радзе краін-удзельніц СНД ён не выдзелены законамі ў самастойную катэгорыю. Напрыклад, у Расійскай Федэрацыі Закон “О рынках ценных бумаг” прадугледжвае механізм праектнага фінансавання, які дазваляе звязаць выпуск аблігацый з грашовымі патокамі канкрэтнага праекта. Спецыялізаваная структура (спецыялізаванае таварыства) праектнага фінансавання ствараецца для фінансавання доўгатэрміновага праекта і валодае абмежаванай праваздольнасцю.

Мадэльны закон, які распрацоўваецца, павінен устанавіць агульныя падыходы да вызначэння інфраструктурнага праекта, сувязі прыцягнутага фінансавання з такім праектам, раскрыцця інфармацыі і выкарыстання мер стымулявання. Прапаноўваецца ўвесці спецыяльны статус інфраструктурнай аблігацыі, захаваўшы ўстаноўленыя нацыянальным заканадаўствам працэдуры выпуску і абарачэння каштоўных папер. Плануецца, што дзяржаўная падтрымка будзе прадастаўляцца па рашэнні адпаведнай дзяржавы, а сам па сабе статус інфраструктурнай аблігацыі не створыць фінансавых абавязкаў дзяржавы. Канкрэтны састаў мер стымулявання вызначае кожная дзяржава. Да іх могуць адносіцца паскораныя рэгістрацыйныя працэдуры, падатковыя льготы з абмежаваным тэрмінам дзеяння, частковыя гарантыі, пашырэнне магчымасцяў інвесціравання сродкаў пенсійных фондаў і страхавых арганізацый, іншыя меры.

Папярэдні аналіз паказвае, што для распрацоўкі мадэльнага закона спатрэбіцца больш глыбокае вывучэнне асобных палажэнняў дзеючага заканадаўства аб рынку каштоўных папер, праектным фінансаванні, дзяржаўна-прыватным партнёрстве, бюджэтным рэгуляванні і дзейнасці інстуцыянальных інвестараў.

Замежны вопыт і яго выкарыстанне ў нашай краіне, у тым ліку на аснове наднацыянальнага заканадаўства, можа ў перспектыве пазітыўна адбіцца на эканоміцы краіны, – падкрэсліў парламентарый Павел Ашурык.

Ірына СТЫРНІК   

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga