Ці можа звычайны паход у бібліятэку ператварыцца ў падарожжа ў краіну цудаў? Безумоўна! У Гезгалаўскай сельскай бібліятэцы-цэнтры экалагічнай культуры адбылася яркая падзея, якая дала старт новаму творчаму праекту: свае дзверы адчыніў лялечны тэатр кніжных герояў “Кніжуля”.
Першымі гасцямі і галоўнымі крытыкамі сталі выхаванцы мясцовага дзіцячага сада. Для малечы падрыхтавалі сюрпрыз – сустрэчу з героямі добра вядомай казкі “Курачка Раба”. Лялечны спектакль захапіў дзяцей з першых хвілін: яны не проста назіралі за прыгодамі, а шчыра суперажывалі персанажам, вучыліся дабрыні і спачуванню разам з імі.
Каб замацаваць цікавасць да кнігі, тут падрыхтавана цэлая інтэрактыўная праграма. Дзеці з захапленнем разглядалі чароўныя кніжныя навінкі, якія так і вабілі сваімі маляўнічымі старонкамі. Асаблівую цікавасць выклікала знаёмства з незвычайным жыхаром установы – папугаем Кешам, які стаў любімцам маленькай публікі.
Кемлівасць і фантазію дзеці праявілі падчас гульняў з лэпбукам “У гасцях у казкі”. Гэты фармат дазволіў кожнаму дакрануцца да свету літаратуры праз гульню, што вельмі важна для пачатку вялікага шляху чытача.
Дэбют тэатра “Кніжуля” паказаў: калі кніга і тэатр ідуць побач, дзяцінства напаўняецца сапраўднымі адкрыццямі. Гэта толькі пачатак вялікага шляху. Наперадзе ў маленькіх жыхароў Гезгалаў яшчэ шмат сустрэч з любімымі героямі.
Паважаныя бацькі! Памятайце, што любоў да чытання пачынаецца з эмоцый. Запрашаем вас і вашых дзяцей у бібліятэку – месца, дзе казкі ажываюць, а кнігі становяцца лепшымі сябрамі.
Марына ГРЭЦКАЯ,
бібліятэкар Гезгалаўскай бібліятэкі
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
