“Хвала на вышынях Богу, а на зямлі супакой людзям добрай волі!”
Гэтым спевам анёлаў была абвешчана радасная навіна пра нараджэнне ў горадзе Давідавым, Бэтлееме, Божага Сына. Ён дзеля нас, людзей, і дзеля нашага збаўлення зышоў з Неба, уцелавіўся ад Святога Духа з Панны Марыі і стаўся чалавекам.
Дарагія браты і сёстры, глыбокапаважаныя святары, кансэкраваныя асобы, вернікі Дзятлаўшчыны!
Прыміце самыя шчырыя і цёплыя віншаванні са светлым найвялікшым хрысціянскім святам – Нараджэннем Хрыстовым!
Божае Нараджэнне – адно з самых светлых і прыгожых свят, напоўненае атмасферай усеагульнай згоды і любові.
Божае Нараджэнне зноў запрашае нас у Бэтлеем, дзе пастушкі знайшлі Марыю, Юзафа і немаўля, якое ляжала ў яслях. Узгадваючы падзеі той ночы пастараемся перажыць іх нанова. Будзем заклікаць Святога духа, каб дапамог увайсці ў таямніцу бэтлеемскай ночы, удзельнічаць у ёй з любові, у духоўнай блізкасці са Святой Сям’ёй.
Глыбокі духоўны сэнс падзеі, якая адбылася ў Бэтлееме шмат стагоддзяў назад, застаецца важным і актуальным і ў наш час. Вялікі цуд нараджэння Езуса Хрыста сведчыць сабой перамогу веры, надзеі і любові, якія так неабходны людзям сёння. Калі б Бог засвяціўся ў поўную сваю моц, свет у адзіным парыве ўпаў бы перад ім на калені. Але Гасподзь паступіў інакш – Ён, як заўсёды, пакінуў чалавеку права выбару. Няхай жа наш выбар будзе на карысць будаўніцтва рэчаіснасці па завеце Божым. Няхай жа Бэтлеем заўсёды жыве ў нашых сэрцах і дамах. Няхай Хрыстос нараджаецца ў нашых сэрцах, каб яго любоў прыносіла плён штодзённых учынкаў любові, Яго радасць дапамагала перамагаць усялякі страх і боязь, а Яго дабрыня – схіляцца над патрабуючымі.
У гадзіну Божага Нараджэння яднаюся з вамі, дарагія браты і сёстры – католікі і праваслаўныя ўсёй Дзятлаўшчыны, у радаснай удзячнасці Богу Усемагутнаму за Яго бясцэнны дар. Дзіцятка Езус няхай адорыць сваім бласлаўленнем вашы сем’і: жанатых умацуе ва ўзаемнай любові, дзецям дапаможа расці ў ласках і мудрасці. Людзі старэйшыя, нашы дзядулі і бабулі, няхай не ведаюць, што такое адзінота. Хворыя і тыя, хто пакутуе, няхай атрымаюць здароўе і палёгку. У сэрцах моладзі – нашай будучыні – няхай запануе спакой.
Віншую ўсіх людзей добрай волі!
Жадаю шчаслівых святаў Божага Нараджэння і Новага 2023 года, святаў добрых, спакойных і поўных радасці.
З гэтымі пажаданнямі, дарагія браты і сёстры, дзялюся з вамі аплаткай – знакам еднасці ў Хрысце.
Ад усяго сэрца благаслаўляю.
З малітвай ксёндз-пробашч парафіі Унебаўзяцця Найсвяцейшай Панны Марыі горада Дзятлава Здзіслаў ПІКУЛА
