Напярэдадні Усебеларускага народнага сходу мы цікавімся ў нашых землякоў з розных сфераў дзейнасці, як яны ацэньваюць сёняшняе жыццё, якіх рашэнняў чакаюць ад форуму.
Сваімі думкамі падзялілася жыхарка аграгарадка Гезгалы Святлана Крэйдзіч:
– Даўно працую ў Цэнтры сацыяльнага абслугоўвання насельніцтва Дзятлаўскага раёна і апошнія некалькі гадоў з’яўляюся сацыяльным работнікам пры кватэры сумеснага самастойнага пражывання для грамадзян пажылога ўзросту і інвалідаў аграгарадка Гезгалы.
Маім падапечным жывецца тут вельмі камфортна, бо ў кватэры па-дамашняму ўтульна, нішто не нагадвае сацыяльную ўстанову, ды і атмасфера – амаль сямейная: побач сябры-равеснікі з якімі можна размаўляць на агульныя тэмы, узгадаць мінулае. Пажылыя людзі не адчуваюць у нас адзіноты, яны сагрэты, накормлены, дагледжаны, жывуць у чысціні.
У Гезгалах ёсць яшчэ адна падобная сацыяльная ўстанова – Дом сумеснага самастойнага пражывання для грамадзян пажылога ўзросту і інвалідаў, дзе створаны не менш спрыяльныя ўмовы для насельнікаў. Нашы бабулі і дзядулі задаволены, не хочуць пакідаць гэтыя ўстановы, лічаць іх другім домам. Тут можна дастойна і шчасліва жыць у старасці.
Напярэдадні VI Усебеларускага народнага сходу вельмі спадзяюся, што ў нашай краіне пытанням сацыяльнай абароны грамадзян па-ранейшаму будзе надавацца шмат увагі, што на Дзятлаўшчыне і ў іншых рэгіёнах Беларусі застануцца такія сацыяльныя формы ўладкавання пажылых людзей, як дамы сумеснага самастойнага пражывання і аддзяленні дзённага знаходжання.
Ірына КАЎКЕЛЬ
Фота Вольгі ЮШКЕВІЧ
