Рыхтуемся да Усебеларускага сходу. Людміла Савасцюк: “У нас даступная медыцынская дапамога” (+відэа)
Загадчыца Раклевіцкага фельчарска-акушэрскага пункта Людміла Савасцюк была ўдзельніцай V Усебеларускага народнага сходу.
Напярэдадні чарговага форуму яна паразважала аб тым, што ўжо зроблена і што належыць зрабіць.
– У мінулы раз была дадзена ацэнка нацыянальнай сістэме аховы здароўя, як адной з лепшых у свеце. На той час Беларусь дзяліла першае месца з Канадай. Можна адзначыць, што і сёння ў нашай краіне рэалізоўваецца ўстойлівая мадэль аховы здароўя з бюджэтнай сістэмай фінансавання, што даказала свае перавагі, асабліва ў барацьбе з каранавіруснай інфекцыяй. Гарантаванае Канстытуцыяй бясплатнае медыцынскае абслугоўванне застаецца даступным для ўсіх сацыяльных катэгорый насельніцтва Беларусі.
На Дзятлаўшчыне забяспечваецца выкананне сацыяльных стандартаў у галіне аховы здароўя. Асаблівая ўвага надаецца прафілактыцы. Для ранняга выяўлення захворванняў і фактараў рызыкі іх развіцця вядзецца планамерная работа па дыспансерызацыі насельніцтва, скрынінгавыя даследаванні. Для зручнасці пацыентаў укаранёна работа дактароў агульнай практыкі, неабходную дапамогу і рэкамендацыі можна атрымаць не прыбягаючы да кансультацый вузкіх спецыялістаў. Невялікім установам аказваецца дастойная фінансавая падтрымка: толькі за 2020 год Раклевіцкі ФАП быў забяспечаны глюкометрам і электравеласіпедам.
Каб і ў бліжэйшую пяцігодку нацыянальная сістэма аховы здароўя развівалася, а беларусы атрымлівалі якасную медыцынскую дапамогу, лічу, варта прадоўжыць умацаванне матэрыяльна-тэхнічнай базы медарганізацый, якасна ажыццяўляць падрыхтоўку кадраў, надаваць больш увагі замацаванню маладых спецыялістаў у сельскай мясцовасці і невялікіх раёнах, эканомна і рацыянальна выкарыстоўваць матэрыяльныя і фінансавыя рэсурсы.
Ірына СТЫРНІК
Фота Вольгі ЮШКЕВІЧ
