19 снежня ў раёне прайшоў Адзіны дзень інфармавання насельніцтва.
Працавала некалькі груп. Інфармацыйна-прапагандысцкая група старшыні Дзятлаўскага райвыканкама Аляксандра Дубовіка сустрэлася з жыхарамі аграгарадка Дварэц.
Пагутарылі аб традыцыях суверэннай Беларусі, спыніліся на праблемах махлярства з дапамогай высокіх тэхналогій і мерах па супрацьдзеянні незаконнаму абароту наркотыкаў.
Было адзначана, што расце колькасць злачынстваў, звязаных з крадзяжамі грашовых сродкаў грамадзян з выкарыстаннем камп’ютарнай тэхнікі (524 выпадкі на Гродзеншчыне). Сотні беларусаў сталі ахвярамі вішынга – тэлефоннага махлярства па выманьванні ў гаспадароў банкаўскіх карт канфідэнцыйнай інфармацыі (за лістапад – каля 400 злачынстваў). Каб не стаць ахвярамі зламыснікаў, жыхарам раёна параілі быць абачлівымі ў інтэрнэце. Нельга нікому паведамляць рэквізіты сваіх банкаўскіх картак. Абавязкова трэба правяраць просьбы сяброў у сацыяльных сетках наконт грашовай дапамогі, бо часам ад іх імя дзейнічаюць злачынцы, якія ўзламалі старонкі. Рэквізіты картак, нумары пашпартоў, асабістыя ідэнтыфікацыйныя нумары, лагіны, паролі, СМС-коды ў даверлівых людзей махляры з лёгкасцю даведваюцца па тэлефоне, прадставіўшыся работнікамі банка. Варта памятаць, што гэту інфармацыю паведамляць нельга. У выпадку паступлення падобнага званка трэба пакласці трубку і самому звянуцца ў кантакт-цэнтр банка, які выпусціў картку.
Шмат увагі на Гродзеншчыне надаецца барацьбе з незаконным абаротам наркотыкаў. Цяпер на ўліку ў наркалагічнай службе вобласці больш за тысячу наркаспажыўцоў, у рэспубліцы іх колькасць перавышае дванаццаць тысяч. Праблему наркаманіі наша дзяржава вырашае, працуючы па трох асноўных накірунках: папярэджанне, аказанне дапамогі, спыненне злачыннай дзейнасці. Праваахоўныя органы Беларусі спыняюць міжнародны наркатрафік, раскрываюць дзейнасці арганізаваных груп наркадылераў, выяўляюць асобаў, якія збываюць наркотыкі на сістэмнай аснове, супрацьдзейнічаюць уцягванню ў наркаспажыванне непаўналетніх. На жаль, інтэрнэт усё часцей становіцца віртуальнай пляцоўкай па распаўсюджванні наркотыкаў сярод моладзі. Праваахоўнікі стараюцца крочыць у нагу з часам, і за апошнія пяць гадоў ім удалося знізіць колькасць падобных інтэрнэт-магазінаў больш чым у два разы. Не губляе актуальнасці праблема опійнай наркаманіі. Папулярнасцю сярод такіх наркаспажыўцоў карыстаецца насенне маку як сыравіна для опію. У беларускім заканадаўстве прапісаны меры па барацьбе з гэтай з’явай. А Крымінальны кодэкс нашай краіны прадугледжвае дастаткова сур’ёзныя пакаранні за злачынствы, звязаныя з незаконным абаротам наркотыкаў. Дзеянні па распаўсюджванні наркатычных сродкаў караюцца пазбаўленнем волі да 15 гадоў. Сур’ёзныя пакаранні і сістэмны падыход да праблемы дазваляюць стрымліваць рост наркаманіі ў нашай рэспубліцы.
Ірына СТЫРНІК
