Другі дзень на Дзятлаўшчыне працуюць ініцыятыўныя групы па зборы подпісаў для вылучэння кандыдатаў у Прэзідэнты Беларусі. Чарговы пікет, арганізаваны раённай арганізацыяй РГА “Белая Русь”, прайшоў у гарпасёлку Наваельня.
Ён быў адметны актыўнасцю пасялкоўцаў і прыўзнятым настроем, якому паспрыяў выхадны дзень. Былі тыя, хто мэтанакіравана прыйшоў паставіць подпіс за вылучэнне пэўнага кандыдата, і тыя, хто выйшаў у цэнтр па сваіх справах і разам з тым праявіў грамадзянскую актыўнасць.
Галоўнае, што патрабавалася ад грамадзяніна, які вырашыў аддаць подпіс у падтрымку вылучэння кандыдата, – мець з сабой пашпарт або іншы дакумент, які сведчыць асобу.
– Некаторыя, хто забыўся пра гэта, вяртаюцца дадому па дакументы або тэлефануюць блізкім, каб іх прывезлі. Пакуль пераважна прыходзяць людзі ва ўзросце, але ёсць і моладзь, – распавялі прадстаўнікі ініцыятыўнай групы.
Для новаяльнянцаў такое мерапрыемства – нагода не толькі праявіць грамадзянскую актыўнасць, але і сустрэцца, пагутарыць, паслухаць добрыя песні ў выкананні работнікаў Новаяльнянскага дома культуры. Расказалі, з якім настроем прыйшлі на пікет.
Таццяна Шалесная:
– Працую ў мясцовым выканкаме, таму добра знаёмая з этапамі электаральнай кампаніі. Прыйшла ў выхадны падтрымаць подпісам свайго кандыдата, каб не адрываць на гэта ўвагу ў час работы. Мы з мужам заўсёды ходзім на выбары, дачка жыве ў Гродне і галасуе там. Упэўнена, што выбары Прэзідэнта – самая галоўная палітычная падзея, таму удзельнічаць у іх важна для кожнага грамадзяніна.
Іван Грыб:
– Лічу, што выбарчую актыўнасць трэба праяўляць кожнаму грамадзяніну Рэспублікі Беларусь, неабходна мець сваю жыццёвую пазіцыю. Я думаю, што мы выберам самага дастойнага, які будзе абараняць наш суверэнітэт, нашу дзяржаву, народ. Я, як пенсіянер, моцна адчуваю падтрымку дзяржавы: паднімаецца памер пенсій, нядаўна для людзей быў прыняты добры закон аб сумяшчэнні работы з пенсіяй, мы маем магчымасць на бясплатнае якаснае медыцынскае абслугоўванне. Хочацца, каб ужо хутчэй прывялі ў парадак нашу бальніцу ў Наваельні, і будзе ўсё выдатна.
Тамара Жэгалік:
– Выбары Прэзідэнта патрэбныя нам усім, каб мір быў у краіне, каб дзеці працавалі і былі ўпэўненыя ў заўтрашнім дні, каб унукі вучыліся і ўсё ў нас было добра. У выбарах удзельнічаем заўсёды. Сёння, як даведалася ад знаёмых, што ў цэнтры праходзіць пікет за майго кандыдата, адразу ўзяла дакументы і пайшла падпісвацца.
***********************************************************
Нагадаем, этап выбарчай кампаніі па зборы подпісаў для вылучэння кандыдатаў у Прэзідэнты Беларусі стартаваў у краіне 7 лістапада. Ініцыятыўным групам неабходна сабраць не менш як 100 тысяч подпісаў для вылучэння кандыдатаў у Прэзідэнты. Збор подпісаў праходзіць у форме пікетавання ў месцах, не забароненых рашэннем раённага выканаўчага камітэта. Ажыццяўляць збор подпісаў могуць толькі члены ініцыятыўнай групы на пікетах, а таксама па месцы жыхарства, работы (службы) выбаршчыкаў. Член ініцыятыўнай групы павінен мець пры сабе адпаведнае пасведчанне і дакумент з фотаздымкам, які пацвярджае яго асобу. У падпісным лісце павінны быць подпісы выбаршчыкаў, якія пражываюць на тэрыторыі раёна, горада. Выбаршчыку неабходна самому паставіць дату і распісацца. Ён мае права паставіць подпіс у падтрымку некалькіх кандыдатур, якія прапануюцца для вылучэння кандыдатамі ў Прэзідэнты, але толькі адзін раз у падтрымку адной і той жа кандыдатуры. Збор подпісаў прадоўжыцца да 6 снежня ўключна. Любая агітацыя ў гэты час забаронена.
З 7 па 21 снежня ЦВК будзе прымаць дакументы для рэгістрацыі кандыдатаў. З 22 па 31 снежня адбудзецца рэгістрацыя. Перадвыбарная агітацыя і інфармаванне выбаршчыкаў пройдуць з 1 па 25 студзеня 2025 года, датэрмінова прагаласаваць можна будзе з 21 па 25 студзеня. Выбары Прэзідэнта Беларусі назначаны на 26 студзеня.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
