На постсавецкай прасторы лічыцца, што суп — гэта аснова правільнага харчавання, таму есці яго трэба штодня і пачынаць абавязкова з дзяцінства.
А вось еўрапейскія дыетолагі прытрымліваюцца іншай думкі: суп на здароўе не ўплывае, таму ўжываць яго так часта не абавязкова. І каму верыць?
З большага еўрапейцы маюць рацыю: есці гэтую страву дастаткова 2–3 разы на тыдзень. Аднак карысць для арганізма ён усё ж прыносіць. Правільна прыгатаваны суп – гэта збалансаваны набор бялкоў, тлушчоў і вугляводаў, а таксама вітамінаў і мінералаў.
Мясны суп
Для мяснога булёну лепш браць нятлустае мяса (курыцу, індычку). Перад гатаваннем зніміце з птушкі скуру — пазбавіцеся ад лішняга халестэрыну і калорый. Мясны булён давядзіце да кіпення, зніміце пенку і варыце яшчэ некалькі хвілін, пасля чаго зліце ўсю вадкасць, прамыйце мяса і перакладзіце назад у каструлю, заліце чыстай вадой. Варка на другім булёне паменшыць канцэнтрацыю ў страве антыбіётыкаў, халестэрыну і экстрактыўных рэчываў, якія павялічваюць сінтэз і ўзровень кіслотнасці страўнікавага соку. Наварыстыя мясныя булёны не рэкамендаваны людзям з язвавай хваробай, гастрытам.
Агароднінны суп
Чым больш разнастайная агародніна ў ім, тым больш карысці. Толькі не абсмажвайце яе папярэдне на алеі ці сале. Агародніну трэба закідваць у канцы прыгатавання, пачынаючы з той, якая варыцца даўжэй, а зяленіва – ужо пасля выключэння. Так захаваецца больш карысных рэчываў.
Рыбны суп
Марская рыба вельмі тлустая, хоць і змяшчае карысныя тлушчы. А яшчэ ў ёй можа знаходзіцца свінец, таму рыбны суп, як і мясны, трэба варыць на другім булёне.
Суп-пюрэ
Смачная, але часта каларыйная страва, асабліва калі варыць яе на вяршках, з маслам і грэнкамі. Лепш гатуйце яго на вадзе ці булёне з вялікай колькасцю агародніны, тады суп стане крыніцай вітамінаў, мікра- і макраэлементаў, а таксама заменіць адну-дзве з пяці рэкамендуемых Сусветнай арганізацыяй аховы здароўя порцый агародніны для тых, хто не жадае яе есці ў іншым выглядзе.
Важна
У суп можна дадаваць адзін від круп або макароны з цвёрдых гатункаў пшаніцы.
Развенчваючы міфы
- Суп – не дыетычная страва. Тлустая салянка, наварысты мясны булён, грыбны суп могуць справакаваць абвастрэнне захворванняў страўнікава-кішачнага тракта і/або сардэчна-сасудзістай сістэмы.
- Суп не разводзіць страўнікавы сок і не зніжае ўзровень стрававальных ферментаў.
- У супе заўсёды застаюцца вітаміны і мікраэлементы, галоўнае, правільна яго варыць.
Гатуем суп правільна:
- Абавязкова злівайце першы булён.
- Не забывайце здымаць тлушч і пену пры варцы булёну.
- Саліце, калі вада пачне закіпаць.
- Не бойцеся выкарыстоўваць спецыі і розныя травы.
- Варыце на невялікім агні.
- Памер агародніны і іншых інгрэдыентаў павінен быць такім, каб іх не даводзілася дзяліць на часткі лыжкай у талерцы.
- Падрыхтаваныя прадукты закладвайце ў кіпячы булён, пачынаючы з тых, якія цяжка разварваюцца.
- Падтрымлівайце стан пастаяннага ціхага кіпення. Для гэтага наступны прадукт закладвайце толькі пасля ўзнаўлення кіпення.
І. СІЛЬЧУК,
доктар агульнай практыкі Дзятлаўскай ЦРБ
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
