Стымул – не хварэць. Як перажыць спёку — Дятлово. Перамога. Дятловская районная газета

Спякотнае надвор’е – сапраўдны стрэс для арганізма.

Калі тэмпература паветра перавышае 30 градусаў, варта задумацца пра тое, як дапамагчы арганізму, спачатку неабходна разабрацца ў прычынах дрэннага самаадчування. Каб пазбавіцца ад лішняга цяпла, унутраныя органы чалавека працуюць з перанапружаннем, а калі ёсць залішняя вага – яны аказваюцца ў “тэрмасе”, бо тлушчавая абалонка – выдатны тэрмаізалятар. Адбываецца перагрэў арганізма, магчымы цеплавы ўдар. Каб астудзіць скурныя покрывы, чалавек залішне пацее, пры гэтым з вадкасцю выводзяцца карысныя солі і мікраэлементы, што прыводзіць да слабасці мышц, у тым ліку і сардэчнай. З’яўляецца смага, і, калі яе не здаволіць, кроў згушчаецца, з’яўляецца небяспека тромбаўтварэння. Змагаючыся з перагрэвам, арганізм пераразмяркоўвае крывацёк, накіроўваючы кроў да канечнасцяў, з’яўляюцца ацёкі. Акрамя таго, у гарачым паветры зніжаецца колькасць кіслароду, а значыць, яго менш паступае ў арганізм. Артэрыяльны ціск чалавека няўстойлівы, магчымы яго рэзкія ўздымы і падзенні, расце нагрузка ў цэлым на сардэчна-сасудзістую сістэму, з’яўляецца галавакружэнне, страта прытомнасці, гіпертанічныя крызы і больш сур’ёзныя ўскладненні. І здароваму чалавеку бывае часам цяжка справіцца з наступствамі высокіх тэмператур паветра, але асабліва складана людзям, у якіх ёсць хранічныя захворванні. Што рабіць, каб выжыць у спёку?

Піце вадкасць
Піце ў гарачыя дні не менш за 2-2,5 літра вадкасці ў дзень часта, невялікімі глыткамі. Не щжывайце вельмі халодныя, салодкія напоі. Абараніць арганізм ад перагрэву дапаможа мінеральная вада, свежыя сокі (іх лепш разводзіць вадой 1 : 1), зялёны чай, настоі з мелісы, кветак ліпы, кропу, чабора.
Водныя працэдуры
Калі ёсць магчымасць – прымайце душ пакаёвай тэмпературы некалькі разоў на дзень, раніцай і ўвечары – кантрасны, для паляпшэння цеплаабмену, і захавання энергіі і працаздольнасці на ўвесь дзень.
Харчуйцеся правільна
У спёку трэба есці менш, ежа павінна быць лёгкай, нізкакаларыйнай. Замест бутэрбродаў з каўбасой на сняданак лепш ужываць кашы, тварог, агародніну. У абед замяніць наварыстыя тлустыя супы на халаднік, бурачнік, булёны. Адмоўцеся ад смажанай ежы. У рацыён уключайце больш агародніны, садавіны, малочных прадуктаў. Заўсёды звяртайце ўвагу на дату вырабу і тэрміны захоўвання прадуктаў, прастаўленыя на ўпакоўцы.
Захоўвайце рэжым і гігіену
Старайцеся без патрэбы не выходзіць на вуліцу з 12 да 17 гадзін – у пік спёкі. Калі магчыма, дазваляйце сабе пасляабедзенны адпачынак, сон. Абараняйце скуру сонцаахоўнымі крэмамі, вочы – сонцаахоўнымі акулярамі. Карыстайцеся кандыцыянерам, вентылятарам, каб знаходзіцца ў больш камфортных умовах. Не выкарыстоўвайце актыўна касметыку – дайце скуры твару адпачыць. Надзявайце свабоднае адзенне з натуральных тканін, галаўны ўбор, абутак на нізкім абцасе. Не выконвайце празмерных нагрузак у спартыўнай зале, ніякіх работ, што патрабуюць высокіх затрат энергіі, у тым ліку на дачы. Гэта асабліва актуальна для людзей, якія маюць гіпертанічную хваробу, ішэмічную хваробу сэрца, цукровы дыябет, захворванні шчытападобнай залозы, атлусценне, анкалогію.