26 чэрвеня прафесійнае свята адзначаюць работнікі пракуратуры.
Аб рабоце і задачах установы расказаў пракурор Дзятлаўскага раёна Віталій Юрго:
– Пракуратура сумесна з праваахоўнымі органамі прымае меры па ўмацаванні ў раёне законнасці і правапарадку, абароне правоў і інтарэсаў грамадзян, узмацненні барацьбы са злачыннасцю і карупцыяй. За пяць месяцаў 2024 года на Дзятлаўшчыне з 82 да 57 знізілася колькасць зарэгістраваных злачынстваў, з 26 да 17 – крадзяжоў. Вялася праверка выканання патрабаванняў Дырэктываў Прэзідэнта, заканадаўства аб прафілактыцы правапарушэнняў, прыродаахоўнага, антыкарупцыйнага заканадаўства, утрымання і захаванасці сельскагаспадарчых жывёл, прымаліся меры па папярэджанні гібелі людзей на пажарах.
– Сёлета Беларусь святкуе 80-годдзе вызвалення ад нямецка-фашысцкіх захопнікаў. Як ідзе расследаванне крымінальнай справы аб генацыдзе беларускага народа?
– У рамках справы, узбуджанай Генпракуратурай, працуем тры гады. Беларусь неаднаразова станавілася арэнай жорсткіх бітваў. На жаль, трагічныя падзеі 1941-1944 гадоў не абышлі Дзятлаўшчыну. Толькі 9 ліпеня 1944 года наш раён быў вызвалены ад ворагаў, якія больш чым за тры гады акупацыі тысячамі знішчалі мірнае насельніцтва. Крывавым быў снежань 1942 года, калі адбылася карная аперацыя “Гамбург” супраць партызан, якія базіраваліся ў Ліпічанскай пушчы, і “лаяльных” вяскоўцаў, у ходзе якой поўнасцю знішчаны вёскі Вялікая Воля і Навасёлкі, часткова – Дубраўка, Дубароўшчына, Трахімавічы, Пушча Ліпічанская, Гарадкі, Малая Воля, а ўсяго ў гады ваеннага ліхалецця пацярпелі 22 населеныя пункты. На тэрыторыі раёна было створана 6 месцаў прымусовага ўтрымання мірнага насельніцтва. У рамках крымінальнай справы аб генацыдзе па звестках жыхароў і архіўных крымінальных справах устаноўлена месца расстрэлу вязняў Новаяльнянскага гета. На верасень-кастрычнік гэтага года запланаваны пошукавыя работы ў гарпасёлку Казлоўшчына. Апытаны 142 сведкі ваенных падзей і іх сваякі, праведзена больш за 154 агляды месцаў здарэння. Мы імкнёмся да ўстанаўлення максімуму фактаў і праяваў генацыду, бо гэта даніна памяці і захаванне гістарычнай праўды.
– Што сярод перспектыўных задач?
– Нягледзячы на станоўчую дынаміку па зніжэнні злачыннасці, ёсць і праблемныя пытанні, вырашэнне якіх патрабуе больш пільнай увагі ад праваахоўных органаў раёна. Найперш гэта злачынствы ў сферы кібербяспекі, сярод якіх пераважаюць крадзяжы з выкарыстаннем камп’ютарнай тэхнікі, калі махляры тэлефануюць жыхарам раёна і падманным шляхам даведваюцца рэквізіты іх банкаўскіх картак.
– Раскажыце пра калектыў.
– У штаце тры аператыўныя работнікі і столькі ж тэхнічных. Я ўзначальваю пракуратуру раёна з 2022 года, ажыццяўляю нагляд за выкананнем заканадаўства раённымі аддзеламі ўнутраных спраў і Следчага камітэта. Намеснік пракурора Сяргей Аляшкевіч сочыць за выкананнем заканадаўства і законнасцю прававых актаў аб непаўналетніх, у сферы зямельнага і прыродаахоўнага заканадаўства, у прафесіі ён з 2012 года. Самы важкі стаж, больш за 30 гадоў, у памочніка пракурора Ірыны Забелінай, яе абавязкі – нагляд за адпаведнасцю закону судовых пастановаў па крымінальных справах. З 2007 года ў калектыве працуюць вядучы спецыяліст пракуратуры Святлана Пузач і вадзіцель Аляксандр Кулеш, з 2015-га – прыбіральшчыца службовых памяшканняў Алена Вішнарэўская.
– Чаго пажадаеце работнікам сферы да прафесійнага свята?
– Самыя шчырыя віншаванні адрасую ветэранам органаў пракуратуры за тое, што шмат гадоў аддана служылі Айчыне. Цяпер новае пакаленне работнікаў забяспечвае выкананне закона і прадаўжае іх справы. Выказваю ім прызнанне за добрасумленнае выкананне абавязку, жадаю моцнага здароўя, сямейнага шчасця, поспехаў у службе на карысць Радзімы.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
