Мінулі два месяцы 2024 года.
Якімі яны былі для турыстычнай сферы Дзятлаўшчыны? З упэўненасцю можна сказаць – актыўнымі! Згодна з метадычнымі рэкамендацыямі Міністэрства спорту і турызму Рэспублікі Беларусь студзень быў прысвечаны адукацыйнаму турызму.
Для пачатку правялі дні інфармавання ў некалькіх школах, растлумачылі сутнасць адукацыйнага турызму, прапанавалі маршруты, якімі можна скарыстацца, каб зацікавіць школьнікаў гісторыяй роднага краю. Галоўны спецыяліст аддзела адукацыі Дзятлаўскага райвыканкама Алена Гарановіч распрацавала графік наведвання экскурсій і паралельна з гэтым школьных музеяў горада і раёна. Зладжанасць і паслядоўнасць у арганізацыі далі станоўчы вынік. На сённяшні дзень спецыялістам па турызме, атэставаным экскурсаводам праведзена 19 экскурсій з наведваннем музеяў гімназіі № 1, сярэдняй школе № 3 і сярэдняй школе №1 горада Дзятлава.
Асаблівая ўвага была нададзена папулярызацыі экскурсійных аб’ектаў і турыстычна-экскурсійных маршрутаў патрыятычнай накіраванасці, прысвечаных падзеям Вялікай Айчыннай вайны, наведванню мемарыяльных комплексаў, месцаў баявой і партызанскай славы, генацыду беларускага і яўрэйскага народаў на Дзятлаўшчыне. Інфармацыя пра мерапрыемствы ў рамках месячніка адукацыйнага турызму размяшчалася ў сацыяльных сетках Instagram, Fasebook (14 артыкулаў), у сетцы Tik-Tok Visit_dyatlovo (7 відэаролікаў), на старонках і сайце газеты “Перамога” (3 публікацыі).
Люты быў прысвечаны лячэбна-аздараўленчаму і медыцынскаму турызму. Згодна з планам правядзення месячніка таксама былі арганізаваны дні інфармавання ў Раклевіцкай сярэдняй школе (сайт газеты “Перамога” – “Адзіны дзень галасавання. Абмеркавалі актуальныя тэмы”), а таксама спецыялісты сектара спорту і турызму сумесна з турыстычным цэнтрам наведалі санаторый «Альфа-Радон» і двойчы санаторый «Радон», дзе сустрэліся з кіраўніцтвам установаў і адпачывальнікамі.
Вынік наведвання – экскурсіі для замежных гасцей, якія папраўляюць здароўе ў санаторыях. У сацыяльных сетках ТІЦа тэма месячніка асветлена ў 12 артыкулах і 2-х відэароліках.
У сакавіку пачынаецца месячнік прамысловага турызму. Спадзяёмся, што ён будзе не менш актыўным, чым два папярэднія.
Алена Абрамчык,
спецыяліст па турызме Дзятлаўскага раённага турыстычнага інфармацыйнага цэнтра
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
