Бясконца можна глядзець на тое, як гарыць агонь, цячэ вада і як людзі паркуюцца ў не дазволеных для гэтага месцах, не жадаючы прайсці лішнія 50-100 метраў.
Асабліва актуальнай гэта праблема становіцца ў перадсвяточныя дні, калі клопатаў і раз’ездаў шмат, а часу на пошук стаянкі – наадварот. Самы цікавы квест – запаркавацца каля райпаліклінікі ў будні дзень. Калі мы прыехалі туды па справах рэдакцыі, вольных месцаў, акрамя стаянкі для інвалідаў, не знайшлося.
– Закон не парушаем, – адназначна заўважыў вадзіцель рэдакцыі, высадзіў мяне каля тратуара і накіраваўся шукаць парковачнае месца недзе паблізу.
А я стаяла і здзіўлена назірала, як на месца для інвалідаў насуперак усім правілам паркуецца легкавік без апазнавальных знакаў, адтуль выходзіць мужчына сярэдніх гадоў. У размове з ім я пацікавілася, чаму той дазваляе сабе парушэнне правілаў дарожнага руху. Як высветлілася ў размове, права паркавацца на месцы для людзей з абмежаванымі магчымасцямі мужчына мае, а вось налепкі на заднім шкле аўтамабіля – не.
Нюансамі неадназначнай сітуацыі пацікавілася ў супрацоўнікаў міжраённага аддзела ДАІ па абслугоўванні Слонімскага, Дзятлаўскага і Зэльвенскага раёнаў.
– Праблема парушэння правілаў паркоўкі на месцах для інвалідаў – адна з найбольш распаўсюджаных, якую мы выяўляем у час планавых рэйдаў, – расказаў дзяржаўтаінспектар Андрэй Іскра. – Нярэдка на спецыяльна адведзеных месцах знаходзяцца аўтамабілі, вадзіцелі якіх маюць адпаведныя дакументы, але не пазначаюць свой транспарт знакам “Інвалід”, што таксама з’яўляецца парушэннем.
Нярэдка дзяржаўтаінспектары фіксуюць і адваротную сітуацыю, калі вадзіцелі без нейкіх фізічных асаблівасцяў займаюць на стаянках месцы, спецыяльна прызначаныя для людзей, якія адносяцца згодна з правіламі дарожнага руху да групы “інваліды”. Матывы парушальнікаў розныя: няўважлівасць, эгаізм або банальная спешка, але вынік у такіх сітуацыях адзін: на першы раз – папярэджанне, на другі – штраф.
– Ці часта фіксуеце паўторныя парушэнні?
– Як ні дзіўна, такіх фактаў дастаткова, – заўважае інспектар.
На што спадзяюцца вадзіцелі-рэцыдывісты, незразумела. Калі на стаянцы каля той жа бальніцы сапраўды бывае дэфіцыт парковачных месцаў, то каля магазіна “Еўраопт” паркуйся – не хачу! Але, згодна са статыстыкай ДАІ, і там у снежні знайшліся жадаючыя патраціць грошы не на мандарыны, а “навагодні” штраф.
Наталля АВЯРЧУК
