Пытанне: куды тэлефанаваць, калі з-за безнаглядных жывёлаў страшна ўвечары выйсці на вуліцу?
Адказвае ўчастковы інспектар АУС райвыканкама Сяргей Клімчук:
– Для пачатку варта ўдакладніць, што адлоў безнаглядных жывёлаў знаходзіцца ў падпарадкаванні жыллёва-камунальнай арганізацыі. Менавіта работнікі ЖКГ збіраюць заяўкі, а затым і вырашаюць праблему. Праваахоўнікі ўступаюць у справу, калі было парушана адміністрацыйнае ці крымінальнае заканадаўства.
Як правіла, да нас звяртаюцца ў тых выпадках, калі ўладальнікі сабак (у абсалютнай большасці) не выконваюць устаноўленыя законам патрабаванні іх выгулу, а за гэта прадугледжаны штраф. Да прыкладу, многія не надзяваюць на сабаку наморднік і проста выпускаюць пагуляць. Далёка не ўсе суседзі з захапленнем і разуменнем ставяцца да такіх шпацыраў і паведамляюць пра дадзеныя факты ў дзяжурную часць. На месца выбываюць супрацоўнікі аддзела, каб правесці праверку і ўстанавіць гаспадара, які парушыў правілы. Калі на працягу 10 дзён гэтага зрабіць не атрымліваецца, то праверка спыняецца, але звесткі аб безнагляднай жывёле перадаюцца ў ЖКГ для рэагавання.
Калі ж спушчаны сабака, да прыкладу, задушыў суседскіх курэй або гусей, то рашэнне аб прыцягненні да адказнасці і яе форме вырашае ўжо суд.
Каб атрымаць больш падрабязную інфармацыю па вызначаным пытанні або па іншых, якія адносяцца да кампетэнцыі органаў унутраных спраў, вы можаце звярнуцца непасрэдна ў АУС Дзятлаўскага райвыканкама, або на прыём да ўчастковага інспектара міліцыі штотыдзень па серадах: у сельскай мясцовасці з 10.00 да 13.00, у горадзе з 17.00 да 20.00.
Ірына КАМАРОВА
Фота Вольгі ЮШКЕВІЧ
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
