Прафарыентацыя. Кар’ера пачынаецца з адукацыі

Кожны чалавек павінен знайсці сябе ў жыцці.

Гэта складаны і адказны момант. Навучэнцам старэйшых класаў у гэтым дапамагаюць дні прафарыентацыі з удзелам прадстаўнікоў навучальных установаў, арганізацый, прадпрыемстваў. Чарговая сустрэча адбылася на базе гімназіі № 1 райцэнтра, куды завіталі прадстаўнікі ваеннага камісарыята Дзятлаўскага раёна і вайсковай часці 97040 з Гродна.

Будучым выпускнікам расказалі аб Ваеннай акадэміі Рэспублікі Беларусь, факультэтах і спецыяльнасцях установы, парадку паступлення і правілах прыёму ў іх, а таксама аб жыцці і вучобе курсантаў.

У завяршэнні сустрэчы навучэнцы не спяшаліся разыходзіцца. Многія асабіста задалі пытанні вайскоўцам. Прычым сярод жадаючых атрымаць адказы былі не толькі юнакі, але і дзяўчаты.

Таццяна Трашчаліна, начальнік групы прызыву на ваенную службу ваеннага камісарыята Дзятлаўскага раёна:

– Адной з важных задач дзяржавы з’яўляецца ваенна-патрыятычнае выхаванне моладзі, у аснове якога ляжыць падрыхтоўка маладых людзей да службы ва Узброеных Сілах, пастаяннай гатоўнасці да абароны Радзімы. Формы і метады работы ў гэтым кірунку самыя разнастайныя. Напрыклад, сёння мы пабывалі на мерапрыемстве па прафарыентацыі, у рамках якога адбылася сустрэча навучэнцаў з прадстаўнікамі вайсковай часці. Лічу, важным таксама ў сферы ваенна-патрыятычнага выхавання юнакоў з’яўляецца навучальны прадмет “Дапрызыўная падрыхтоўка”. На вучэбных занятках падлеткі авалодваюць неабходнымі для далейшай службы ў арміі ведамі і навыкамі. Таксама хочацца адзначыць, што правядзенне работы па ваенна-патрыятычным выхаванні моладзі спрыяе прафілактыцы ўхіленняў ад ваеннай службы.