Уборка гэтай сельскагаспадарчай культуры актыўна ідзе ва ўсіх гаспадарках Дзятлаўшчыны.
ААТ “Граніт-Агра” наблізілася да экватару ўборкі кукурузы на зерне і хутка завершыць нарыхтоўку на сілас. У работах задзейнічаны вопытныя механізатары гаспадаркі.
Аб ходзе работ расказала галоўны аграном таварыства Алена Майсейчык:
– Агульная плошча пасеву кукурузы сёлета склала 1700 гектараў, з іх 1160 гектараў убіраецца на сілас і 540 на зерне. Нарыхтавана 24 200 тон сіласу (у тым ліку з кукурузы – 23 890 тон). Убрана 89 % плошчаў кукурузы на сілас пры сярэдняй ураджайнасці 277 цэнтнераў з гектара. На 19 кастрычніка намалочана 1474 тоны зерня кукурузы, убрана 34 % пасяўных плошчаў пры сярэдняй ураджайнасці 80 цэнтнераў з гектара. Акрамя гэтага, у гаспадарцы вядзецца плюшчэнне кукурузы з закладкай у палімерныя рукавы. Ужо заплюшчана 397 тон, плануецца закласці яшчэ каля 200 тон.
Алена Сяргееўна адзначае, што ў параўнанні з леташняй ураджайнасць кукурузы істотна ніжэйшая: гэта звязана з сёлетнімі перыядамі анамальнай засухі на пачатку яе росту і ў момант выспявання зерня, ад чаго моцна пацярпеў лісцевы апарат культуры.
У ААТ “Граніт-Агра” ўборку кукурузы ажыццяўляюць камбайнеры Уладзімір Гукіш, на рахунку якога намалот больш за 1000 тон, і Уладзімір Чарняўскі.
Пераважная большасць ураджаю культуры будзе выкарыстана на ўласныя патрэбы сельгаспрадпрыемства, найперш, на корм жывёле, лішкі будуць рэалізоўвацца ў раёне.
Наталля АВЯРЧУК
Фота Вольгі ЮШКЕВІЧ
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
