Прайшлі рабочыя пасяджэнні ў намесніка старшыні Дзятлаўскага райвыканкама Ігара Кухарэвіча па пытаннях развіцця турызму ў Дзятлаўскім раёне.
На працягу двух дзён у іх прынялі ўдзел прадстаўнікі санаторных установаў і ўласнікі аграсядзібаў раёна.
Як прыцягнуць турыстаў і прывабна прадставіць турыстычны патэнцыял Дзятлаўшчыны? Гэта пытанне павінна вырашацца калектыўна, комплексна і сістэмна ўсімі зацікаўленымі службамі, лічаць супрацоўнікі сектара спорту і турызму.
Сярод пытанняў, якія павінны быць вырашаны ў бліжэйшыя гады, – рэканструкцыя пад’язных шляхоў да санаторыяў, стварэнне новых веладарожак усюды, дзе гэта магчыма, з’яўленне спецыяльных месцаў для стаянкі турыстычнага транспарту і, нарэшце, рэклама турыстычных паслугаў нашага раёна для наведвальнікаў санаторыяў “Радон” і “Альфа Радон”. Сёння на Дзятлаўшчыне больш за 20 турыстычных маршрутаў разнастайнай накіраванасці. Сярод іх – пешыя, аўтобусныя, веламаршруты і водныя, байдарачныя, асабліва папулярныя летам. Ужо сёлета іх можна прапанаваць арганізаваным групам турыстаў, аднак актуальным пытаннем застаецца з’яўленне ў раёне спецыялізаванага турыстычнага транспарту і атрыманне ліцэнзіі на турыстычныя перавозкі.
Сустрэча з уласнікамі аграсядзібаў прайшла ў фармаце выступленняў і абмеркаванняў, гаспадары прыватнага турыстычнага бізнесу выказалі свае заўвагі і прапановы, бачанне далейшага супрацоўніцтва з раённай уладай.
– Для эфектыўнага развіцця аграэкатурызму ў раёне ўладальнікі аграсядзібаў, сённяшнія канкурэнты, павінны аб’яднацца і настроіцца на актыўнае ўзаемадзеянне і ўзаемную рэкламу, – звярнуўся да ўдзельнікаў сустрэчы Ігар Кухарэвіч. – Супрацоўніцтва з работнікамі культуры дапаможа суб’ектам турыстычнага бізнесу зрабіць свае пачынанні каларытнымі, эксклюзіўнымі. Усе аграсядзібы будуць уключаны ў карты і турыстычныя маршруты Дзятлаўшчыны.
Развіццё агратурызму – інвестыцыі ў падтрыманне населеных пунктаў, дзе размешчаны яго аб’екты, – гучала як лейтматыў сустрэчы.
Загадчык сектара спорту і турызму Дзмітрый Ёда адзначыў, што да канца года пройдзе раённы этап рэспубліканскага агляду-конкурсу аграсядзібаў “Пазнай Беларусь”, які адначасова стане маніторынгам дзейнасці прадпрымальнікаў.
– Аграсядзібы павінны засяродзіцца на аказанні турыстычных паслугаў, мець свой каларыт, індывідуальнасць, а не стаць банальна месцам для арэнды і правядзення банкетаў, – агучыў ён ідэю развіцця агратурызму ў краіне.
Спецыяліст “Белаграпрамбанка” пазнаёміла прысутных з умовамі, на якіх бізнесмены могуць атрымаць фінансавую падтрымку для развіцця бізнесу. Са свайго боку, раённы аддзел культуры прапанаваў гаспадарам аграсядзібаў шырокі спектр забаўляльных паслугаў ад дзіцячых святаў да народных гульнявых праграм і выступлення аўтэнтычных калектываў.
Сярод прапановаў, якія выказалі ў час пасяджэння прыватныя прадпрымальнікі, стварэнне і прасоўванне адзінага для ўсіх аграсядзібаў Дзятлаўшчыны сайта, які можна будзе лёгка знаходзіць праз пошукавую сістэму. Сярод іншага быў агучаны шэраг бытавых і заканадаўчых пытанняў, якія ім не пад сілу вырашыць без дзяржаўнай падтрымкі.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
